చిన్మయ రూపిణీ !

దురితంబుల్ పలు జేసినన్, చపలతన్ దుష్టాత్ములన్ గూడినన్,
తరముల్ ముందటి తాత తాత లెవరో ధన్యాత్ములై చేయ నీ
స్మరణల్ కాచును వారి వంశజుల నే జన్మంబునందైన నో
హరిణీ! చిన్మయ రూపిణీ! దురిత దూరా! దుష్ట సంహారిణీ!

చిన్మయ రూపిణీ !

నిను దర్శించెద నీటి బిందువులలో నింజూచెదన్ నిప్పునన్
నిను భావించెద మంద మారుతములో నిన్ జూతు నుష్ణోగ్రతన్
నిను గాంతున్ తెలిమంచు వేకువలలో నిన్ గoదు నీరెండలో
కనెదన్ చిన్మయ రూపిణీ ! జగతి నిక్కమ్మెల్లడన్ నిన్ సదా.

చిన్మయ రూపిణీ !

శిష్టుడ గాను నీయెడల చిత్తము నిల్పగ లేని దుర్మతిన్
కష్టములందు నైన నిను కాస్తయు నెంచని కల్మషాత్ముడన్
స్పష్టము జేయవే కృపను చక్కగ నీ పరతత్త్వమమ్మరో
ఇష్టుడు గాడు వీడనుచు నెంచకు చిన్మయ రూపిణీ ! పరా!

చిన్మయ రూపిణీ !

జానకియై రఘూద్వహుని జాయగ నుండుట నీవు లంకకున్
వానర మూక దోడ్కొని యపార సముద్రము దాటి పోయి యా
హీనుడు రావణున్ దునిమి యెల్ల జగమ్ముల బ్రోచినాడు శ్రీ
భాను కులాబ్ధి సోముడని పల్కెద చిన్మయ రూపిణీ ! పరా!

చిన్మయ రూపిణీ !

నీ లలితాధరమ్మునను నిండుగ పూచిన నవ్వు పువ్వునే
నీల గళుoడు చంద్రునిగ నిత్యము దాల్చు శిరమ్ము నందునన్
రాలకునైన జీవమిడు రాజిలు నీ దరహాస చంద్రికల్
మాలిమి పొంగుటల్ కతన మానుగ చిన్మయ రూపిణీ ! శివా!

చిన్మయ రూపిణీ !

ఎంత యగాధమో తలుప నెంతటి దుష్కరమౌనొ దాటగా
నంతము లేనిదీ భవమహా నను ముంచుచు నున్న దాయె నీ
చింతన నావతో దరికి జేర్చి తరింపగ నీవె సత్కృపన్
పంతము చూపగన్ జనని! భావ్యమె? చిన్మయ రూపిణీ! కటా!

చిన్మయ రూపిణీ !

క్షుద్రు లనిత్య సౌఖ్యముల గోరి, నిరంతర భాగ్య సర్వతో-
భద్రదమౌ భవాంఘ్రి యుగ భావన సేయరు, మూఢ చిత్తులై
రుద్ర మనోహరీ! యముని రోగ జరా మరణాది కింకరుల్
ఛిద్రము సేయరే బ్రతుకు చిన్మయ రూపిణి ! నేర రేలొకో!

శివశివా !

గంగమ్మ తలపైన గంతులేయుచు నుండ
.......................కలత లేదా నీల కంఠ నీకు ?

పార్వతి సగమేను పంచుకొన్నను గాని
......................వెలితి లేదా నీకు విశ్వనాథ ?

పాములు మేనిపై ప్రాకుచున్నను నీకు
.....................వెలపరమ్మే లేద వేదవేద్య ?

చితిబూది పూసుక చిందు లేసెడి నీకు
....................చింతలే లేవేమి చిచ్చుకంటి ?

మంచు కొండ గూడు! మంచినీరు విషమ్ము!
భూత ప్రేత తతులు భూరి జనము !
చేత భిక్ష పాత్ర ! చిరునగ వెట్లౌను
శివము లిచ్చు టెట్లు శివశివయన ?

నెత్తిపైన గొప్ప నీటి యూటను బెట్టి
మంచు కొండలందు మసలు చుండి
నీటి ధారలందు నిత్యము నానినన్
జలుబు లేద నీకు చకిత మౌను !

కార్తిక ప్రభాత కాలమందున మాకు
స్నాన మాచరింప జంకు చలికి
మంచు కొండ పైన మసలుదు వీవెట్లు ?
చలిని గెల్చు నట్టి సులువు చెప్పు.

రెండు కనుల మాకు రేయంత కలలౌను
పగటి కలల గల్గు పరవశమ్ము
మూడు కన్నులున్న ముక్కంటివే నీవు!
కలలు రావె చిచ్చు కంటి నీకు ?

ఎండ వేడి మాకు, నిప్పు వేడిచ్చును
కోప తాపములను గొప్ప వేడి
చిచ్చు కంటి వీవు చితిభూమి ప్రియమేమి
వేడి లేద నీకు విశ్వమూర్తి !

శివ శివా యనంగ శివముల నిత్తువే
యిట్టి పాటు లేల నిందు ధారి!
శివ శివా ! ఎరుంగ శక్యమే ధాత్రినీ
తత్త్వ మెవరి కైన తలచు కొలది.

తెలుగు వెలుగు.

పాప నవ్వువోలె పాల మీగడ వోలె
మంచి గంధ మట్లు మల్లె లట్లు
వీణ పాట రీతి విన సొంపుగా నుండు
తీయ తేనె లొలుకు తెలుగు పలుకు.

వేమనార్యుడన్న విలువైన మాటలు
సుమతి శతక కర్త సూక్తి సుధలు
భవిత తీర్చి దిద్దు బంగరు బాటలై
తెలుగు జాతి రీతి తెలియ జెప్పు.

తేటగీతి సీస మాట వెలందియు
నందమైన కంద చందములును
కృష్ణ రాయ విభుడు కీర్తించె హర్షించి
దేశ భాషలందు తెలుగు లెస్స.

అమ్ములేసి నిలిపె నల్లూరి దొరలను
సింగమట్లు దూకె టంగుటూరి
అమరజీవి యాయె నా పొట్టి రాములు
తెలుగు కీర్తి దిశల తేజరిల్ల.

భోజనమ్ము నందు బొబ్బట్లు పులిహార
పనసపొట్టు కూర పచ్చిపులుసు
ఆవకాయ ఘాటు లాపైన గోంగూర
తినిన జిహ్వ లేచు తెలుగు రుచుల.

అట్లతద్ది భోగి యాపైన సంక్రాంతి
కనుమ బొమ్మనోము ఘన యుగాది
చవితి దశమి దివిలి శివరాత్రి బతుకమ్మ
తెలుగు పండుగలకు తీరు మిన్న,

అతిథి నాదరించు నయ్యల పూజించు
నమ్మ నాన్నలన్న నమిత భక్తి
అన్నదమ్ములందు నైకమత్యమ్మును
తెలుగు నేల నంత వెలుగు చుండు.

ఆంధ్రమందునైన అమెరి కా లోనైన
వెలుగులీను చుండు తెలుగు పలుకు
మనిషి దూరమైన మమతలు మాయునా
మైత్రి మహిమ మిన్న ధాత్రి లోన.

చిన్మయ రూపిణీ !

అంబుజపాణి! నీ యభయ హస్తపు నీడన క్రీడలాడు నన్
డింభకుగా దలంచెదవొ డింగరు డంచని జాలి జూపెదో
అంబరమంటు సంబరము లంబ! శరత్తున నిన్ భజింపగన్
డంబము కాదులే శశికళాధరి! చిన్మయ రూపిణీ! శివా!

దీపావళి

దివ్వెల కాంతులు, వెల్గుల భ్రాంతులు, తేజము నిండగ నెల్లెడలన్
రివ్వున జువ్వలు, రవ్వల రువ్వులు, రిక్కలు పొంగగ నింగి పయిన్
దవ్వుల, దాపుల, సవ్వడి, సందడి దద్దరిలంగను నల్దిశలున్
నవ్వులపువ్వులు, తియ్యనిబువ్వలు నల్వురుమెచ్చగ రమ్యముగన్!

చిన్మయ రూపిణీ !

శ్రీ మాతా! భువనైక పాలిని! సదా శ్రీ చక్ర సంచారిణీ!
సోమార్కాగ్ని విలోచనీ! సురనుతా! సోమేశ్వరాహ్లాదినీ!
వామాక్షీ! వరదాయినీ! భగవతీ! వాగీశ్వరీ! వాజ్ఞ్మయీ !
రామా! చిన్మయ రూపిణీ! రసధునీ! రాజ్ఞీ! రమా! రాగిణీ!

చిన్మయ రూపిణీ !

శ్రీ వసుధాఖ్యవై, ధరను శ్రీల నొసంగెడు లక్ష్మివై, సదా
భావము లేలు బ్రాహ్మివయి, ప్రాణుల చేతన రూప శక్తివై,
పావన భారతావనిని పల్లె జనమ్ములు మ్రొక్కు గ్రామపుం-
దేవతవై రహింతు గద దీప్తుల చిన్మయ రూపిణీ! శివా!

చిన్మయ రూపిణీ !

పోదురు భార్య, బిడ్డలును, పోదురు బంధు సహోదరాళియున్
పోదురు సేవకీ జనము, పోవును సంపద, ప్రాణ మానముల్
పోదుసుమా త్వదీయ పద పూజల గల్గు ఫలమ్మనంతమై!
సాధు జనావనీ! శరణు శంకరి! చిన్మయ రూపిణీ ! ఉమా!

చిన్మయ రూపిణీ !

నశ్వరమైన సంపదల నమ్మి కృశించి నశించు మానవుల్
శాశ్వతమైన నీ చరణ సన్నిధి జేరి సుఖింప నేర్తురే?
విశ్వసనీయ సత్యములు వీనుల కెక్కునె చేటు కాలమం-
దీశ్వరి! లోకమాత! పరమేశ్వరి! చిన్మయ రూపిణీ! పరా!

చిన్మయ రూపిణీ !

కౌమారీ యవతారివై నలువకున్ కన్విన్దువై! వాణివై!
శ్రీమంతుండగు పద్మనాభు నెడదన్ క్రీడించు శ్రీ దేవివై!
కామారీ తను తాప హారిణివియై! కాత్యాయనీ రూపివై !
రామా! చిన్మయ రూపిణీ! రసధునీ! రంజిల్లవే నిత్యమున్!

గురుర్బ్రహ్మా.......

మనసా వాచా కర్మణా విద్యా బోధనకే జీవితము
నంకితము జేసిన ఉపాధ్యాయులకు నమోవాకములు.

గురువన నాదిజుడౌ ధర
గురువే హరి గురువు శివుడు గురువే సాక్షా-
త్పర తత్త్వమైన బ్రహ్మము
గురువుకు వందనము లిడుదు గురుతర భక్తిన్.

అజ్ఞానపు చీకట్లను
సుజ్ఞానపు ప్రభల జీల్చి శూన్యము చేయున్
విజ్ఞానము బోధించును
ప్రజ్ఞా మూర్తులుగ గురువు ప్రజలను దిద్దున్.

విద్యా బుద్ధుల గఱపుచు
హృద్యంబగు నీతి పథము నింపుగ జూపు-
న్నాద్యుండగు దైవంబై
సద్యశమును కల్గజేయు సద్గురువెపుడున్

చిన్మయ రూపిణీ !

ధర్మ పథమ్ము వీడి, పర తత్త్వ మెఱుంగక, నైహికమ్ములౌ
శర్మపు జాలముం దగిలి, శాశ్వత మీ తనువంచు నెంచి, దు-
ష్కర్మము లాచరించుదురు, కాని, భవాంఘ్రి సరోజ చింత స-
త్కర్మ నొనర్ప బూనరు గదా ప్రజ! చిన్మయ రూపిణీ ! కటా!

వినాయకా నిను వినా .........

చేత వేడి కుడుము,చెన్నొందు పూమాల,
ఎలుక వాహనమ్ము, యేన్గు మొగము,
పెద్ద చెవులు, బొజ్జ, పెరికిన దంతమ్ము
విఘ్నరాజ! నీకు వేయి నతులు.

కమ్మని యుండ్రములను తిని
యిమ్ముగ తిరుగాడ భూమి, నిమ్మని చందా
గమ్మున మూగిన భక్త జ-
నమ్ముల గని జారుకొను వినాయకు దలతున్!

" ఎంత కాల మిటుల నీ వెట్టి చాకిరీ ?
మోయలేను నిన్ను పోదు స్వామి! "
అన్న ఎలుక ముందు నిన్ని యుండ్రము లుంచి
బుజ్జగించు దేవు బుద్ధి గొలుతు!

నా పూరణ

సమస్య :
అమ్మా రమ్మని పిల్చె భర్త తన యర్థాంగిన్ ప్రమోదమ్మునన్.

" సొమ్ముల్ చాలును, నీ సమక్ష మొకటే శోభిల్ల జేయున్ సదా
కొమ్మన్, పెట్టుము క్రొత్త కాపురము నీకున్ మేల " టంచాడరే
అమ్మా నాన్నలు ? నీదు ముచ్చటలు భామా! తీరుగా! ముద్దు లే-
వమ్మా? రమ్మని పిల్చె భర్త తన య యర్థాంగిన్ ప్రమోదమ్మునన్.

కంది శంకరయ్య గారి శంకరాభరణం సౌజన్యంతో................

చిన్మయ రూపిణీ !

ఆదిజుడున్, త్రివిక్రముడు, ఆ హరుడున్, సురరాజు, దిక్పతుల్
మోదము తోడ నీ పదము మ్రోల శిరస్సులనుంచి మ్రొక్క త్వ-
త్పాద నఖోజ్జ్వలద్యుతుల వారి కనుంగవ గ్రమ్మె జీకటుల్ !
శ్రీ! దురితాంతకీ ! జనని! చిన్మయ రూపిణి ! చిద్విలాసినీ !

చిన్మయ రూపిణీ !

విరులన్ సౌరభమై, ఫలాల రుచివై, విశ్వమ్మునన్ భ్రాంతివై ,
ఝరులన్ వేగమవై , మొయిళ్ల మెరుపై , చైతన్యమై జీవులన్ ,
గిరులన్ నిబ్బరమై , యెడంద దయవై, క్రీడింతు వీ వెల్లెడన్
సిరివై! చిన్మయ రూపిణీ! స్మిత ముఖీ! శ్రీ రాజ రాజేశ్వరీ!

చిన్మయ రూపిణీ !

ఇంద్రు సురాధిపత్యమును, ఈశు పురాంతక శక్తియుక్తులున్,
చంద్రుని కాంతులున్, సవితృ సంక్రమణంబులు , చక్రి లక్ష్మియున్,
సంద్రపు లోతులున్, శ్రుతులు స్రష్టకు నీ కరుణా ప్రసాదముల్!
చంద్ర కళాధరీ ! జనని ! శాంకరి ! చిన్మయ రూపిణీ ! పరా !

లక్ష్మీ స్తవం - అగస్త్య స్తుతి

లక్ష్మీస్తవం - అగస్త్య స్తుతి



మాతర్నమామి కమలే! కమలాయతాక్షి! శ్రీ విష్ణు హృత్కమలవాసిని! విశ్వ మాతః!
క్షీరోదజే కమల కోమల గర్భ గౌరి! లక్ష్మి ప్రసీద సతతం నమతాం శరణ్యే!

త్వం శ్రీరుపేంద్రసదనే మదనైక మాతః! జ్యోత్స్నాసి చంద్రమసి చంద్ర మనోహరాస్యే!
సూర్యే ప్రభాసి చ జగత్త్రితయే ప్రభాసి! లక్ష్మి ప్రసీద సతతం నమతాం శరణ్యే!

త్వం జాతవేదసి సదా దహనాత్మ శక్తిః ! వేధా స్త్వయా జగదిదం వివిధం విదధ్యాత్ !
విశ్వంభరోపి బిభృయా దఖిలం భవత్యా! లక్ష్మి ప్రసీద సతతం నమతాం శరణ్యే!

త్వం త్యక్త మేత దమలే హరతే హరోపి ! త్వం పాసి హంసి విదధాసి పరావరాసి!
ఈడ్యో బభూవ హరిరప్యమలే త్వదాప్త్యా! లక్ష్మి ప్రసీద సతతం నమతాం శరణ్యే!

శూరః స ఏవ సగుణీ స బుధః స ధన్యో ! మాన్యః స ఏవ కులశీల కలాకలాపై!
ఏకః శుచిః స హి పుమాన్ సకలేపి లోకే! లక్ష్మి ప్రసీద సతతం నమతాం శరణ్యే!

యస్మిన్వసేః క్షణ మహో పురుషే గజేశ్వే స్త్రైణే తృణే సరసి దేవకులే గృహేన్నే!
రత్నే పతత్రిణి పశౌ శయనే ధరాయాం సశ్రీక మేవ సకలే తదిహాస్తి నాన్యత్!

త్వత్ స్పృష్టమేవ సకలాం శుచితాం లభేత త్వత్ త్యక్తమేవ సకలం త్వశుచీహ లక్ష్మి !
త్వన్నామ యత్రచ సుమంగళ మేవ తత్ర శ్రీ విష్ణుపత్ని కమలే కమలాలయేపి!

లక్ష్మీం శ్రియంచ కమలాం కమలాలయాంచ పద్మాం రమాం నళినయుగ్మ కరాంచ మాంచ!
క్షీరోదజా మమృత కుంభ కరా మిరాంచ విష్ణుప్రియా మితి సదా జపతాం క్వ దుఃఖం ?

(' ఋషిపీఠం 'వారి సౌజన్యంతో)

చిన్మయ రూపిణీ !

ముగ్ధ మనోహరాకృతిని మోహమునన్ బడద్రోసి శంభునిన్,
దగ్ధము జేయ మన్మథుని, తండ్రివి గావవె యంచు వేడవే!
దుగ్ధము లాను నాడె పలు దుర్గుణముల్ ప్రభవించె నా మదిన్
దగ్ధము జేయ వేడగదె తండ్రిని చిన్మయ రూపిణీ ! శివా!

చిన్మయ రూపిణీ !

కంతుని వైరి నీ సగము కాల విషమ్మశనమ్ము వానికిన్ !
చెంతను గంగ నీ సవతి చిందులు ద్రొక్కుచు నుండు నిత్యమున్ !
దంతి ముఖుండు నీ సుతుడు తానొక మూషిక మెక్కుచుండు ! ఏ
చింత లెఱుంగ వైనఁ భళి! చిన్మయ రూపిణి ! చిద్విలాసినీ !

చిన్మయ రూపిణీ !

మ్రొక్కగ భక్తితో నిలచి మ్రోలను నీ పద మంటి యమ్మరో!
దిక్కవు నీవె యంచు కడు దీనత, చూచుచు మిన్న కుందువా?
ఎక్కడ బోదు? నాకికను యెవ్వరు దిక్కు? జనార్తిహారిణీ !
చిక్కుల బెట్టబోకు మిక చిన్మయ రూపిణి! చిద్విలాసినీ!

చిన్మయ రూపిణీ !

పలుకుల తల్లి ! నీ కృపకు పాత్రుని జేయవె జ్ఞాన మిచ్చి నన్
కలుముల కాంత ! నీ కరుణ కాంచన మిచ్చి కుబేరు జేయవే
చలువులగట్టు పుత్రి ! భవ జాడ్యము బాపి పరమ్ము జూపవే
చిలుకవె నీ దయామృతము చిన్మయ రూపిణి ! చిద్విలాసినీ !

చిన్మయ రూపిణీ !

మేలిమి బంగరున్, ధనము, మేడలు, మిద్దెలు, భూషణంబులున్,
ఆలును, బిడ్డలున్, సఖులు నన్ని సుఖమ్ము లశాశ్వ తంబులే,
చాలును నీ పదాబ్జముల శాశ్వత సన్నిధి నాకు నంబికా!
శ్రీ లలితా! భవాని! శివ! చిన్మయ రూపిణి! చిద్విలాసినీ!

చిన్మయ రూపిణీ !

నీ కరుణన్ సృజించెడిని నీరజ సంభవు డెల్ల లోకముల్,
నీ కృప నేలు లోకముల నీరజ నాభుడనంత శక్తుడై,
నీ కను లెఱ్ఱ నౌటను త్రినేత్రుడు వాని లయింప జేసెడిన్!
శ్రీకర మౌను నీ రచన! చిన్మయ రూపిణి! చిద్విలాసినీ!

నా పూరణ

సమస్య:
అంద వికారమె బ్రతుకున నానంద మిడున్.

అందుకొని కుబ్జ చుబుకము
నందాత్మజు డిట్లు పల్కె నవ్వుచు తరుణీ!
కుందెద వేలా? నీయీ
అంద వికారమె బ్రతుకున నానంద మిడున్.

కంది శంకరయ్య గారి శంకరాభరణం సౌజన్యంతో ..........

చిన్మయ రూపిణీ !

నీ లలితా ధరమ్మునను నిత్యముఁ బూచెడి నవ్వు పువ్వులన్
మాలిమిఁ స్వీకరించుచును మాటికి దాల్చు నెడంద ప్రీతితో
నీలగళుండు ! భాగ్య మన నీదె గదా భువనైక సుందరీ!
శ్రీ లలితా! భవాని ! శివ! చిన్మయ రూపిణి ! లోక పాలినీ !

ఋతు సందేశం

చల్ల గాలి తెరలు మెల్లగా వీచును
మల్లె పూల తావి మత్తు గొలుపు
కోయిలమ్మ పాట తీయగా మనసుకు
సంతసమ్ము నిడు "వసంత" వేళ!
***************************
ఎండ మండి పోవు నెఱ్ఱనై సూర్యుండు
గుండె లదర గొట్టు గుబులు హెచ్చు
ఉస్సు రుస్సు రంద్రు నూరూర జనములు
"గ్రీష్మ" తాప మిట్టి రీతి నుండు.
***************************
చిట పటంచు వాన చినుకులు రాలును
ఏడు రంగులీను నింద్ర ధనువు
బీద బిక్కి వార్కి పిడుగు పాటై యొప్పు
"వర్ష" ఋతువు మేలు కర్షకులకు.
***************************
రెల్లు దుబ్బు విరియు తెల్లని పింజలై
నిండు చందమామ నింగి వెలుగు
ప్రకృతి పులకరించు పారవశ్యమ్మున
"శరదృతువు" న పుడమి సంద డించు!
****************************
మంచు బిందు చయము మంచి ముత్యము లట్లు
మెరయు బాల భాను కిరణములకు
చలికి ముసుగు తన్ని సాగెడు వారికి
మంచి సుఖము యీ "హిమంత" మందు!
*****************************
ఆకు రాల్చి చెట్లు ఆశతో చూచును
క్రొత్త చివురు తొడుగు కోర్కె తోడ
రేపు మంచి దంచు రేపుచు నాశల
వశము చేసి కొనును "శిశిర" ఋతువు!
*****************************
కాల దివ్య చక్ర గంభీర గమనాన
చీకటైన వెనుక చిందు వెలుగు
కష్ట సుఖము లిట్లె గమియించు బ్రదుకున
ఎరుక సేయు "ఋతువు" లిట్టి నిజము.

(ది. 8-6-1996 న ఆకాశవాణి విజయవాడ కేంద్రం నుంచి ప్రసారమైన నా కవిత)






re

చిన్మయ రూపిణీ !

దున్మితి వీవు దానవుని దుష్టుని యమ్మహిషున్ క్షణంబునన్!
దున్మితి వీవు లీలగను ధూర్తుని దైత్యుని రక్తబీజునిన్!
దున్మవదేల మద్ధృదిని దోచెడి పాపపు టూహ సోకులన్?
చిన్మయ రూపిణీ! నిను భజించెడి భాగ్యము నిమ్ము సర్వదా!

చిన్మయ రూపిణీ !

ఎన్మిది దిక్కులన్ గలుగు నెన్బది కోటుల జీవ రాశులన్
మున్మమ కార మేర్పడగ మోదముతోడ సృజించినావు, నీ-
పెన్మిటి గూడి చూచెదవు వేడ్కను ప్రాణుల పిల్ల చేష్టలన్
చిన్మయ రూపిణీ! నిను భజించెడు భాగ్యము నిమ్ము సర్వదా!

చిన్మయ రూపిణీ !

నిన్మది నెంచుచున్ నలువ, నీరజనాభుడు, నీలకంఠుడున్
షణ్ముఖ వాసవాది సుర సత్తములే కొనియాడు చుండగా
తన్మయులౌచు! నీ పరమ తత్త్వ మెరుంగగ నాకు సాధ్యమే ?
చిన్మయ రూపిణీ ! నిను భజించెడు భాగ్యము నిమ్ము సర్వదా!

చిన్మయ రూపిణీ!

ఇన్మును జూచి కాంచనము నిట్టె త్యజించెడు వెఱ్రి కైవడిన్
పెన్మమకారపుం బొరలు పేర్కొని యుండగ నాలుబిడ్డలన్
సన్మతి గల్గ బోదు మది చక్కగ నిన్ను స్మరింప భార్గవీ!
చిన్మయ రూపిణీ! నిను భజించెడు భాగ్యము నిమ్ము సర్వదా!

పచ్చదనం

పచ్చదనం పరిశుభ్రత - పాటిద్దాం మనమంతా
పరిమళమూ పవిత్రతా - పంచుదాము భువినంతా ... పచ్చదనం

ఇంటింటికి ఒక మొక్కను - నాటి మనం పోషిద్దాం
ఆంధ్రావని ఎల్లెడలా - హరితవనం చేసేద్దాం ... పచ్చదనం

నువు నాటే ప్రతి మొక్కా - రేపటి చెట్టౌనందాం
నువు నరికే ప్రతి చెట్టూ - శపియించుట నిజమందాం ... పచ్చదనం

అతి వృష్టీ అనా వృష్టి - కిచట తావు లేదందాం
కరవు కాటకాల కికను - చెల్లు చీటి వ్రాసేద్దాం ... పచ్చదనం

వృక్షో రక్షతి రక్షిత - యన్న సూక్తి నిజమందాం
పచ్చదనం పరమాత్ముని - ప్రతిరూపం అనుకొందాం ... పచ్చదనం

ఆంధ్రమాత కాదరాన - హరితాంబర మందిద్దాం
తీయని నూరూ గాలీ - ఆమె కిచ్చి మురిపిద్దాం ... పచ్చదనం

ఆనందం ఆరోగ్యం - అంతటనూ నింపేద్దాం
ఆంధ్ర భూమి భరత ధాత్రి - అమర ధామ మనిపిద్దాం ... పచ్చదనం

చిన్మయ రూపిణీ!

జన్మము నెత్తి నాది భవ జాలము నందున చిక్కి తమ్మరో !
మన్మథ దగ్ధ లోచనుని మాలిమి ప్రేయసి ! మంద హాసినీ!
జన్మ నొసంగ నేల? కడు సంకటముల్ సృజియించ నేలనే ?
చిన్మయ రూపిణీ నిను భజించెడు భాగ్యము నిమ్ము సర్వదా !

చిన్మయ రూపిణీ!

మన్మనమందు షడ్రిపులు మాన్యత బాయగ నుద్యమించుచున్
సన్మతి బాపు చుండెడిని సంతతమున్ భువనేశ్వరీ! కటా!
కన్మని నీకు మ్రొక్కగను కాయము వంగ దదేమి చేయుదున్?
చిన్మయ రూపిణీ! నిను భజించెడు భాగ్యము నిమ్ము సర్వదా!

చిన్మయ రూపిణీ!

మున్మహిషాసురున్ దునిమి మూడు జగమ్ముల నేలవే కృపన్
సన్ముని దేవ సంఘములు సంస్తుతి సేయ భవాని! చండికా!
జన్మము ధన్యమై, తనువు ఝల్లన, మానస ముల్లసిల్లగా
చిన్మయ రూపిణీ! నిను భజించెడు భాగ్యము నిమ్ము సర్వదా!

కల్యాణము చూతము రారండీ!

జానకి పద్మ హస్తముల చాయకు కెంపుల కాంతి, రాలుచున్
భాను కులేశు మస్తకము పైనను మల్లెల శోభ, జారుచున్
మేనను యింద్ర నీల మణి మేలగు దీప్తుల నీను సేసలై
శ్రీనిలయమ్ము లిత్తరిని సేయు శుభంబుల నెల్ల దాత్రికిన్ !

చిన్మయ రూపిణీ!

మన్మథ వైరికిన్ సతివి మాత! భవాని! పరాత్పరీ! శివా!
సన్ముని దేవతా వినుత! శాంకరి! శాంభవి! భద్రకాళికా!
జన్మ శతార్జితాఘపటు జాడ్య విమోచని! జన్మ నాశనీ!
చిన్మయ రూపిణీ! నిను భజించెడు భాగ్యము నిమ్ము సర్వదా!

చిన్మయ రూపిణీ!

జన్మము నెత్తి నందులకు చాలు భవత్పద పద్మ రేణువుల్
తన్మయతన్ ధరించెదను తల్లిరొ! నా శిరమందు భక్తి! నా
జన్మ పవిత్రమై చెలగె! సత్యము పల్కుచునుంటి , శాంభవీ!
చిన్మయ రూపిణీ ! నిను భజించెడు భాగ్యము నిమ్ము సర్వదా!

శేషశాయి

శాంతాకారం! భుజగ శయనం! పద్మనాభం! సురేశం!
విశ్వాధారం! గగన సదృశం! మేఘవర్ణం! శుభాంగం!
లక్ష్మీకాంతం! కమలనయనం! యోగిహృద్ధ్యాన గమ్యం!
వందే! విష్ణుం! భవభయ హరం! సర్వలోకైకనాథం!

ఖరమునకు స్వాగతం !

రావోయీ ఖర నామ వత్సరమ! నీ రాకన్ మదిన్ గోరుచున్,
గోవత్సమ్ములు మేత కేగ జననుల్ గోశాల లో వేచు రీ-
తిన్, వేవేలుగ వేచి చూచెడిని నీ దివ్యాగమా కాంక్షతో
మావుల్, మల్లెలు, కోయిలల్, మధుపముల్ మా మానసాబ్జమ్ములున్!

వసంతానికి స్వాగతం

నిశలు కృశించ సాగినవి, నింబము పూయ నుపక్రమించె, న-
ల్దిశలు వెలార్చె శోభలను దివ్య మధూదయ వేళకై యహ-
ర్నిశలు తపించు మావికిని, నేస్తము కోయిలకున్ శుభంబగున్
శిశిరమ! పోయి రమ్మికను శీఘ్రమె! పంచు నుగాది వేడుకల్.

వచ్చెను వసంత మదిగో!
తెచ్చెను సంతోష ఝరులు దివ్య ధరిత్రిన్!
విచ్చెను ఆశల పువ్వులు!
చెచ్చెర నెమ్మనములందు జీవులకెల్లన్!

గున్న మామిడి కొమ్మ గుబురు లోపల దాగి
.................................పంచమ స్వరములో పాడె పికము!
రంగు రంగుల పూలు హంగుగా ధరియించి
.................................చిరుగాలి నూగెను చెట్టు చేమ!
మలయ మారుత వీచి నల్దిశల్ పయనించి
.................................సుమ సౌరభమ్ముల సుఖము నింపె!
మధువులానగ తేటి మత్తిల్లి తమకాన
.................................లాస్యమ్ము చిందించె లలిత విరులు!

క్రొత్త ఆశలు కోర్కెలు గుండె నింప
మోసికొని వచ్చితీవు ఓ ముద్దుగుమ్మ!
సకల జనముల బ్రతుకుల చక్క దిద్ద
స్వాగతమ్మిదె నీకు వాసంత లక్ష్మి!

విగ్రహాలు

కృష్ణ రాయల కీర్తి కీడు కల్గించెనా ?
.................బ్రహ్మ నాయుండన్న భయమ నీకు?
నన్నయ, యెర్రన నగుబాటు జేసిరా?
.................క్షేత్రయ్య, మొల్లలు చెడిరె నీకు?
సిద్ధేంద్ర యోగులు సిగ్గిల జేసిరా?
.................బళ్ళారి రాఘవ పరుడె నీకు?
అన్నమయ్య పదాలు చిన్న బుచ్చెనె నిన్ను?
.................జాషువా, శ్రీశ్రీ లు శత్రు లైరె?
రఘుపతి, ముట్నూరి రచ్చ చేసిరె నిన్ను?
.................రామలింగా రెడ్డి రంకె లిడెనె ?
గురజాడ, చౌదరి ఘూర్ణిల్ల జేసిరే ?
.................వీరేశ లింగము వెతల నిడెనె ?
ఆర్థరు కాటను ఆరడి బెట్టెనే ?
.................పింగళి వెంకయ్య దొంగ యగునె?

చూడ లేనట్టి యంధుని చూడ్కి నీవు
వ్యవహ రించితి వీనాడు అధము డవయి
తెలుగు మహనీయ మూర్తుల వెలుగు జూపు
విగ్రహ మ్ముల పైననా నాగ్ర హమ్ము?

ద్రౌపది

౧.శాప వశమ్మునన్ భువికి జారిన యప్సర కాంత యేమొకో

భూపతి దించగా వని, తపో వనమందున నున్న సీతయో
పాపము దాసిగా బ్రతుకు భామిని చంద్రమతీ లలామయో
దాపగ లేని ప్రాభవము దాచగ జూచెడి దేవ కాంతయో !

౨.కురులను దువ్వ లేదు మరి క్రొమ్ముడి వేయగ లేదు పాణియం-
దరయగ పాన పాత్ర మది యన్నుల మిన్నకు మోము నందెదో
వెరపును బోలు భావమును విస్తృతమై కనుపట్టెడిన్ కటా!
సరసిజ నేత్రి సోయగపు జాడ కనుంగొన నామె కృష్ణయే!

౩.వరమున బుట్టి పాండు నృపు వంశము మెట్టియు ధర్మ శీలురౌ
పురుషుల బొంది యేవురను భోగములెల్ల త్యజించి దాసియై
విరటుని గొల్వు బాలయెను వింత గదా విధి లీల! రాణికై
సురగొని తేగ కీచకుని చోటుకు పోవుచునుండె దీనయై!

("పొద్దు" ఖర నామ సంవత్సర యుగాది జాలకవి సమ్మేళన నిర్వాహకుల సౌజన్యంతో)

రామ తారక శతకము 20

96 . ధర్మంబు దలచిన తనకును జయమిచ్చు - కర్మంబు దలచిన కాదు జయము 

 శాంతంబు నుంచిన శాశ్వత పదమొందు - శత్రుత్వమున మహా సంకట మగు 

 కుటిలత్వమునను దుష్క్రు తమొందు మనుజుడు - కుటిలత్వమే చేటు కువలయేశ 

 బద్ధులై నటువంటి బంధుల గూడితే - తన వెంట నొకరైన తరలి రారు 

 ఇట్టివారలు నాకేల ఇనకులేశ -

 నీదు కృప గట్టిగా నాకు నిచ్చి తొలుత

 పరమ పదమిచ్చి నన్ను చే పట్ట వయ్య - 

రామ! తారక! దశరథ రాజ తనయ! 

 97 . ఆవేళ యమునిచే నాయాస పడలేక - నీవేళనే మిమ్ము నెలమితోడ నా తల్లి దండ్రి వని నమ్మి నీ పాదముల్ - పట్టి సేవించెద పద్మ నయన శ్రీ రామ శ్రీ రామ శ్రీ రామ యని మిమ్ము - స్మరణ చేసెద నయ్య చక్ర పాణి కోదండ కోదండ కోదండ రామ యని - కొలిచి సేవించెద కోర్కె దీర పద్మ సమ్భవ ముఖ నుత పరమ పురుష - నన్ను వేగాచి రక్షించు నయము తోడ కరుణ తోడుత నను జూడు కమల నయన - రామ! తారక! దశరథ రాజ తనయ!

రామ తారక శతకము 19

91 . రామ కీర్తన లెపుడు లాలించి విను వాడు - వైకుంఠ పురమున వదల కుండు
కృష్ణ నామంబెపుడు కీర్తించి విను వాడు - మధ్యమ పురమందు నమరి యుండు
మధుసూదనా యని మరువక దలచితే - మర్మ కర్మంబులు మాయ మౌను
గోవింద నామంబు కోరి నాదము చేయ - దోష పాపంబులు తొలగిపోవు

అచ్యుతా నంద గోవింద హరి ముకుంద - పదవి నాకిమ్ము నన్నెడ బాయ కుండ
పద్మలోచన నాతండ్రి పరమ పురుష - రామ! తారక! దశరథ రాజ తనయ!

92 .నీ భక్తులగు వారి నిఖిల లోకంబుల - నిజముగా బ్రోతువు నీల వర్ణ
నీ కీర్తి గొనియాడి నీకు సేవలు జేయు - పరమ పుణ్యుల కెల్ల భవ్య పదము
భువి లోన నీ కీర్తి పొందుగా స్తుతియించు - మనుజుల కొదవు నీ మంది రంబు
భక్తుడై యీ రీతి భజన చేయగ నీవు - నుప్పొంగి యిత్తువు నొప్పు తోడ

నిట్టి సేవలు గొని నీవు నిహ పరములు - నారదంబున నాకిమ్ము నాది పురుష
గట్టి గా నీవు నన్ను చే పట్టవయ్య - రామ! తారక! దశరథ రాజ తనయ!

93. యోగ మార్గంబున నెగ సెద నంటి నా - యోగంబు లసలు నా యొద్ద లేవు
గగన మార్గంబున కదలెద నంటినా - కవచ భూషణ మేల కమల నయన
ఆత్మ మార్గంబున నరుగుదు నంటినా - యాత్మ నమ్మిన బంధువరయలేక
అభ్ర మధ్యంబున నరిగెద నంటినా - ఆశ్వ వాహనము నా కలవి గాదు

నీవు దయ దలచి నాయందు నిలిచి యున్న - నఖిల లోకంబులెల్ల నా కల్ప మిపుడు
కుతుకమున నన్ను బ్రోవుము కువలయేశ - రామ! తారక! దశరథ రాజ తనయ!

94 . కైవల్య పదమని ఘనమని యంటినా - కైవల్య పదవి మిము గన్న చోటు
బ్రహ్మ లోకంబాది పదమని యంటినా - బ్రహ్మాదులును నిన్ను ప్రస్తు తింత్రు
ఇంద్ర లోకమె నాకు నిష్టంబ టన్టినా - యష్ట దిక్పతులు మిమ్మాశ్రయిoత్రు
పదవి పదవులు గావు పరమాత్మ నీ పాద - కమల పదవియె పదవి కంస హరణ

యిట్టి పదవులు నాకేల యిన కులేశ - కష్ట పెట్టక యేవేళ కరుణ జూడు
నిష్టతో నన్ను గావుము నీల వర్ణ - రామ! తారక! దశరథ రాజ తనయ!

95 . కమల నాభుడ నిన్ను కన్నుల జూచితే - సంభవించెడు ఫలము స్వామి నాథ
జలజ లోచన నిన్ను శరణని వేడితే - చేపట్టి రక్షించు శేష శయన
పరమాత్మ పరమేశ పద్మ లోచన నిన్ను - గొనియాడ నే జాల గోరినాను
నారాయణ ముకుంద నర హరి నిన్ను నే - నెప్పుడు సేవింతు నీల వర్ణ

ఇటకు రావయ్య నా తండ్రి యిన కులేశ - తడవు జేయక నన్నేలు ధర్మ నిపుణ
నిలువకను వేగ రావయ్య నీరజాక్ష - రామ! తారక! దశరథ రాజ తనయ!

రామ తారక శతకము 18

86 . జనని గర్భము నందు జనియించినది మొదలు - బాల్యమునను గొంత ప్రబలు చుండి
నటుమీద కొమరు ప్రాయంబున కొన్నాళ్ళు - తల్లి దండ్రుల ప్రేమ దనరి యుండి
యవ్వన ప్రాయంబునను రతి క్రీడల - నిన్ద్రియంబుల ప్రేమ నెపుడు దగిలి
ముసలి తనంబున మునుగుచు కొన్నాళ్ళు - కార్పణ్యముల చేత కష్ట పడుచు

నిట్టి కాలంబులను నిన్ను నెరుగలేక - వృద్ధి పొందితి ప్రకృతి చే విశదమగును
కరుణ జూడుము నన్నును కర్మి యనక - రామ! తారక! దశరథ రాజ తనయ!

87 . శ్రీ రామ నా మీద చిత్తంబు రాదాయె - నా తల్లి దండ్రివని నమ్ముకొంటి
దశరధాత్మజ నీకు దయ యింత లేదాయె - నా యిల వేల్పని నమ్ముకొంటి
సత్య సంధుడ నీదు చనువింత లేదాయె - నా ప్రాణ విభుడని నమ్ముకొంటి
భక్త వత్సల నీకు భావంబు లేదాయె - నా మూల ధనమని నమ్ముకొంటి

దూర వలసెను నీ రీతి ధూర్త హరణ - నింద లేకుండ చేపట్టి నిర్వహించు
పరుల నిందించ నాకేల పరమ పురుష - రామ! తారక! దశరథ రాజ తనయ!

88 . మూఢుడు మూర్ఖుడు ముచ్చటాడగ వింత - దీనుల కల్పుల దిక్కు వింత
కోతి కోనంగులు గూడి యుండగ వింత - కుక్క నక్కలు గూడి కూయ వింత
కోపితో కుటిలుండు కూర్మి జేయుట వింత - కపట ఘాతకులెపుడు కలయ వింత
మంత్రులతో మంత్రి ముచ్చటించుట వింత - కీడు మేలెరుగక కీర్తి వింత

ఎంత వారికి లబ్దంబు లంతె గాక - ఆదరింపగ నేర్తురే యధములెల్ల
కలుగు సుజ్ఞానికే గాక ఘనత యశము - రామ! తారక! దశరథ రాజ తనయ!

89. శ్రీ రామ నీవు నా చిత్త మందే నిలిచి - రక్షింప వయ్య నన్నక్షయముగ
నన్ను రక్షింపను నాథు లెవ్వరు లేరు - నా స్వామి నీవని నమ్మినాను
తల్లి వైనను నీవె తండ్రి వైనను నీవె - వేదాంత వేద్య నిన్ వేడినాను
అయ్యోధ్య వాస ఓ అనంత రూపాయ - ఈ వేళ నీవు నన్నేలుకొనుము

నన్ను రక్షింప నిన్ను నే వేడినాను - నమ్మగా జాల నెవ్వరి నెమ్మి తోడ
నీకు ప్రియుడను నమ్మితి నీరజాక్ష - రామ! తారక! దశరథ రాజ తనయ!

90 . దీన దయాకర దీన రక్షక నీవు - కావవే నన్నిప్డు కమల నయన
పరమాత్మ పరమాత్మ పలుకు బొంకించకు - పనులకు మీపాద పద్మ సేవ
కమలేశ కమలాక్ష కరుణతో రక్షింపు - వరము లివ్వవె నాకు వరద ఈశ
లక్ష్మీశ లక్ష్మీశ లలి మీరగా నాత్మ - దలచి రక్షింపవే నీరజాక్ష

పద్మ లోచన వరనుత పారిజాత - స్వామి రక్షించు మిక నన్ను సార్వ భౌమ
నిన్ను నెప్పుడు సేవింతు నీల వర్ణ - రామ! తారక! దశరథ రాజ తనయ!

రామ తారక శతకము 17

81 . నేత్రముల్ గల ఫలము నెమ్మితో మీ చూపు - సుస్థి రత్వంబును చూడ నైతి
జిహ్వ కల్గిన ఫలము శ్రీ హరి నామంబు - తాల్మితోడుత నెపుడు తలచ నైతి
శిరము కల్గిన ఫలము క్షితి మీద సాష్టాంగ - ముగ చక్కగా సాగి మ్రొక్క నైతి
కర్ణముల్ గల ఫలము ఘనమైన మీ కథల - వివరించి బుధులచే వినగ నైతి

హస్తములు గల్గి మిము చాల నను దినంబు - శాంత మొనరంగ పూజలు సల్ప నైతి
చరణముల్ గల్గి మీ సేవ జేయ నైతి - రామ! తారక! దశరథ తనయ!

82 . నాసా పుటము గల్గి నను గాని యేరోజు - తులసి వాసనల నే తెలియ నైతి
సంసారమను మహా సాగరంబున మున్గి - శ్రీ రామ భజన నే జేయ నైతి
బాల్యంబునను దోర బాధ కత్వము జెంది - నీ యందు భక్తియు నిలుప నైతి
యవ్వనంబున కామ్య మానందమును - వొంది కూహ కంబున బుద్ధి కుడువ నైతి

నెంత పాపినో గాక నే నెన్న డైన - దేవు డని నీవె దిక్కని దెలియ నైతి
గాన దుష్కృత మెంచక గావు నన్ను - రామ! తారక! దశరథ తనయ!

83 . శ్రీ రామ వినుము నే క్షితిని జన్మించిన - విధము నెవ్వరి తోడ విన్నవింతు
తల్లి దండ్రులు నాత్మ తనయులు బంధువుల్ - అన్న దమ్ములు దేహ మాత్మ సఖులు
అక్కలు చెల్లెండ్రు నాప్తుల నాప్తులు - నితర బంధువు లెల్ల నిష్ట సఖులు
పరులు నా వారని పాటించి యెప్పుడు - జన లోకముల నెల్ల సత్య మనుచు

భార్య రతి కేళి సంబంధ భరిత మమర - రాజు కిష్టాభి మానుండు రాజసమున
మంత్రి కార్యా వలోచన నాచరించు - రామ! తారక! దశరథ తనయ!

84 . ఇలను బుట్టిన వార లెన్తేసి ఋషు లైరి - వీరితో నెటు వలె విన్న విన్తు
తల్లివి దండ్రివి దాతవు భ్రాతవు - ప్రభుడవు గురుడవు బాంధ వుడవు
నీవు దక్కగ నింక నెవ్వరి తో నేను - బల్కుదు నెటు వలె పరమ పురుష
ఆత్మ రక్షక నిన్నె యాశ్రయిన్చితి దేవ - కాచి రక్షించుమీ కమల నయన

నీదు లాభంబు గోరిన నెన్న డైన - గోర్కె లెల్లను నాకు చేకూరు చుండు
దీన రక్షక నాకును దిక్కు నీవె - రామ ! తారక! దశరథ తనయ!

85 . తోచి తోచక నేను తొడరి మీ చింతన - జేయక సంసార జలధి మునిగి
నడచి నడ్వక బహుళా హార వాంచను - పదపడి మోహ సంభ్రాంతి జెంది
తెలిసి తెలియక కర్మ దేహ వాసన జెంది - తరి గోరి మిమ్ముల దలప నైతి
మరచి మరువక నిత్య మార్గంబులను మిమ్ము - దలచక నింద్రియ తతుల దగిలి

యిట్టి పాపాత్ముడను నన్ను నెలమి నెపుడు - కాచి రక్షించు మన్నించు ఘనత మీర
కృపకు పాత్రునిగా జూడు కువలయేశ - రామ! తారక! దశరథ తనయ!

రామ తారక శతకము 16

76 . నీల మేఘ శ్యామ నిగమ గోచర రామ - ఫాల లోచన వినుత పరమ పురుష
దశరథ నందన తాటకి మర్దన - ఇందీవరేక్షణ యిన కులేశ
అయ్యోధ్య పూరి వాస యాశ్రిత జన రక్ష - కల్యాణ గుణ భర కంస హరణ
విధి శివ రక్షక విష్ణు స్వరూపక - బుధ జన పాలక పుణ్య పురుష

జానకీ నాథ మీకును జయము జయము - సకల బ్రహ్మాండ నాయక శరణు శరణు
కాచి రక్షించు నన్నును కామ జనక - రామ! తారక! దశరథ రాజ తనయ!

77 . రామ నామామృత రసము ద్రావియె కదా - మున్నజా మీళుడు ముక్తు డగుట
రామ నామామృత రసము ద్రావియె కదా - ముని పత్ని శాప విముక్త యగుట
రామ నామామృత రసము ద్రావియె కదా - కలికి చిలుకను బెంచ గలిగె ముక్తి
రామ నామామృత రసము ద్రావియె కదా - యప వర్గ మబ్బె ఖట్వాంగు నకును

రామ నామామృతంబు సంరక్ష సేయ - ముక్తి మార్గంబు గల్గును మూఢు లకును
రామ నామామృతంబున రసికులకును - రామ! తారక! దశరథ రాజ తనయ!

78 . పంకజాక్షుని పూజ పలుమారు జేయక - పరుల నిందించుట పాటి యగునె
విష్ణు సంకీర్తనల్ వీనుల వినకను - పరుల మెచ్చుట నీకు భ్రాంతి యగునె
శేష శయనుని చాల చెలగి కీర్తించక - పరుల కీర్తించుట భవ్య మగునె
నారాయణ స్మరణ నమ్మక యుండక - పర దేవతల భజన పాటి యగునె

శ్రీ రమా నాథు డెప్పుడు జిహ్వ యందు - పుణ్య వరులైన జనులెల్ల పొందు మీర
తలచు వారికి మోక్షంబు తథ్య మరయ - రామ! తారక! దశరథ రాజ తనయ!

79 . సాకేత పూరి రామ శరణు జొచ్చితి నీకు - రక్షింపవే మమ్ము రామచంద్ర
దయతోడ బ్రోవవే దశరథాత్మజ నన్ను - కరుణతో బ్రోవవే కమల నయన
కౌసల్య సుత నన్ను కాచి రక్షింపవే - మన్నించవే నన్ను మదన జనక
జానకీ పతి చాల సత్కృపతో నాకు - విజయంబు నీయవే వేద వేద్య

పరమ పద రామ గోవింద పద్మ నాభ - భక్త వత్సల లోకేశ పరమ పురుష
ధర్మ చరితార్థ దనుజ విదార శూర - రామ! తారక! దశరథ రాజ తనయ!

80 . జప హోమ నిత్యాగ్ని తపములు జేసిన - సరి రావు మీనామ స్మరణ కెన్న
తీర్థ యాత్రలు గొన్ని తిరిగి సేవించిన - సరి రావు మీ నామ స్మరణ కెన్న
నుపవాస వ్రతములు నుడుగక జేసిన - సరి రావు మీ నామ స్మరణ కెన్న
నశ్వమేథంబులు నమితంబు జేసిన - సరి రావు మీ నామ స్మరణ కెన్న

నడవి లోపల నాకు లలములు దినుచు - సంచరించిన నది యేమి సన్నుతికిని
నెంచి చూచిన నవి యెల్ల నేమి ఫలము - రామ! తారక! దశరథ రాజ తనయ!

రామ తారక శతకము 15

71 . శ్రీ రామ జయ రామ సింధు బంధన రామ - కారుణ్య సింధుగంభీర రామ
వారిజోద్ధర రామ వైకుంఠ పతి రామ - దీన నాయక దేవ దేవ రామ
కౌసల్య సుత రామ కాకుత్థ్స కుల రామ - కంస మర్దన శుభాకార రామ
. మా వధూవర రామ మానవేశ్వర రామ - ఆదిత్య కులజ సర్వాత్మ రామ

కర్మ భంజన లోక లోకాభిరామ - నిర్మలాత్మక యయోధ్య నిలయ రామ
నీవె గతి మాకు రక్షించు నిగమ వినుత రామ - రామ! తారక! దశరథ రాజతనయ !

72 . ఎన్ని జన్మంబుల నెత్తితినో కాని - మాధవు దలపక మంద మతిని
వెతల బొందితి గాని యవని మీదను నిప్డు - కాకుత్థ్సు గానక గర్వ మతిని
కాయంబు లన్నియు మాయంబు లాయెనో - గోపాలు నుతి లేక గూలు క్షితిని
ఎందరు తలి దండ్రు లేమైరి యెప్పుడు - రాఘవు దలచక రట్టు వడితి

యింకనైనను రఘు రాము నిపుడు మదిని - బుద్ధిలో నన్య మార్గంబు బొడమ నీక
నను దినంబును శ్రీ రాము నాత్మ దలతు - రామ! తారక! దశరథ రాజతనయ !

73 . ఓర్పు గనుగొన దలచి యొరసి చూచెద వేమొ - పట్టవలసిన కొమ్మ బట్టినాను
వదల వలెనని బహు యుపములు జేసితే - మేల్కొని గట్టిగా మెదలు వాడ
నీ లాగు గాదని యాయాస బెట్టితే - ముకుళిత హస్తుడై మ్రొక్కు వాడ
మ్రొక్కిన గైకొనక మోస పుచ్చెద నంటె - పాదార విన్దముల్ పట్టు వాడ

తల్లి వైనను నీవె నా తండ్రి వైన - దాత వైనను నీవె నా దైవ మనుచు
పాహి పాహని పలుమారు బలుకు వాడ - రామ! తారక! దశరథ రాజతనయ !

74 . వాసుదేవుని పూజ వదలక జేసితే - వైభవంబులు గలుగు వసుధ లోన
గోవిందు నెప్పుడు కొలిచి సేవించితే - సంపద లెప్పుడు చాల గల్గు
నారాయణ స్మరణ నమ్ముక యున్నచో - భుక్తి ముక్తి యు రెండు పొసగ నిచ్చు
విష్ణు సంకీర్తన విడువక జేసితే - దారిద్ర్య దు:ఖముల్ దగుల కుండు

నరులకెల్లను హరి సేవ నయము సుమ్ము - అఖిల సంపదలును గల్గు నాశ్రితులకు
సకల దురితములెల్లను సమసి పోవు - రామ! తారక! దశరథ రాజతనయ !

75 . పంకజాసన జనక బ్రహ్మాండ నాయక - పంకజ లోచన పరమ పురుష
శంకర వందిత సంకర్ష ణవతార - పంకజాక్ష విలోల పద్మ నయన
లక్ష్మీశ యోగీశ లక్ష్మణాగ్రజ రామ - ధాత్రీశ యోగీశ ధర్మ హృదయ
సకల లోకాతీత సర్వజ్ఞగుణ శీల - యకలంక సూర్య కోటి ప్రకాశ

సకల జీవ దయాపర సార్వభౌమ - క్షీర సాగర శయన రక్షించుమయ్య
నిన్ను నే నమ్మి యున్నాను నీరజాక్ష - రామ! తారక! దశరథ రాజతనయ !

రామ తారక శతకము 14

66 . తెలిసి తెలియగ లేరు తెలివి యేలొల్లరో - మాయల బడి బోక మమత తోడ
రామ భూపాలుని రమ్యాక్షరంబుల - నే వేళ నైనను నెప్పు డైన
పని సేయు వేళైన పని లేక యున్నను - చను వేళ నైనను చనువు నైన
భయము నొన్దైనను భ్రమ తోడ నైనను - గలుగక నెందుల కలిమి నైన

పరమ కల్యాణ పరిపూర్ణ భద్ర మూర్తి - వెన్న దొంగను గోపాల విభుని ఘనుని
బుద్ధి దలచిన జనులకు పుణ్య పదవి - రామ! తారక! దశరథ రాజ తనయ!

67 . పర కాంతలను గూడి భంగమ్ము నొందక - పర ధనంబుల గోరి పట్టు వడక
పర బుద్ధి విని వేడ్క పరిహాస మెచ్చక - పరుల నిందించక భయము లేక
పరుల యిండ్లను జేరి పాపముల్ సేయక - పర దారలను బట్టి భ్రమల బడక
పరుల కాశింపక పరుల వెంటను బోక - పర సేవ సేయక పట్టు గాను

మన్మథుని గన్న వానిని మాయ కాని - శంఖ చక్రాబ్జముల వాని శౌరి నెపుడు
వర్ణనలు జేసి పల్కుడీ వందనముల - రామ! తారక! దశరథ రాజ తనయ!

68 . మీనమై జలధిలో మేనును దడియక - వేదముల్ దెచ్చిన వేల్పు వాని
తాబేటి రూపున తగ మందరాద్రిని - వీపున నిల్పిన విభవ శాలి
పంది రూపమ్మున పరి పంధి బరి మార్చి - కోర మీదను నిల్పు గోత్ర ధరుని
మెకముల సామియై మేటి దైత్యుని పొట్ట - జీల్చి చెండాడిన సింహ మూర్తి


పొట్టి తనమున బలిదైత్యు భూమి ద్రొక్కి - రామ రఘు రామ బల రామ బౌద్ధ కల్కి
రీతులను వినుతి సేయుడీ ప్రీతి గాను - రామ! తారక! దశరథ రాజ తనయ!

69 . రుక్మిణీ నాథుని రూపు వర్ణన జేసి - సత్య భామా లోలు శౌరి గనుడి
జాంబవతీ మన సంచారు వేడుడీ - సూర్య వంశేశుని సుభగ మూర్తి
మిత్ర విందా విభుని మేటి కీర్తించుడీ - భద్ర పుత్రా నాథు పాడు డెలమి
శ్రీశ ధాత్రీశుని చెలువుగ్గ డిన్చుడీ - లక్ష్మ ణాగ్రజు జగ ద్రక్ష ణాఢ్యు

నట్టి శృంగార వంతుని నట్టి ఘనుని - నట్టి వీరుని దలచిన నెవ్వడైన
జగము కైవల్య పదవిని జెంద వచ్చు - రామ! తారక! దశరథ రాజ తనయ!

70 . అంధుని చేతికి నద్దంబు నిచ్చిన - జూచునా తన మోము సుందరంబు
కుంటి వానికి నొక్క గుర్రంబు నిచ్చిన - నెక్కునా తన శక్తి నెన్న డైన
షండుని యవ్వన సతి గలదేనియు - కామంబు దీరునా కాంక్ష దీర
అల్పున కొక వేళ యర్థంబు గలిగిన - తెలివితో నిచ్చునా తెగువ తోడ

తన్ను తెలిసికొనక తన శక్తి తెలియక - ధరణి సంపదంత తనదె యన్న
లేదు లాభంబు తనకొక లేశమైన - రామ! తారక! దశరథ రాజ తనయ!

రామ తారక శతకము 13

61 . రావణు జంపిన రామ భూపాలుని - సేవిన్చుడీ మీరు జనములార
సేతు బంధను రాము నేల మెచ్చరు మీరు - తలపర దేటికో ధన్యులార
ఘన జటాయువు కిచ్చె గాంభీర్య పదమని - విని ఎరుంగ రదేమి విమతులార
ఒక్క బాణంబున వాలిని బడవేసి - సుగ్రీవు బ్రోచెను సుజనులార

ఇట్టి త్రైలోక్య ధాముని యింక నైన - తలచ రది యేమి పాపమో ధన్యులార
భూమిజా నాధు డొసగును పుణ్య ఫలము - రామ! తారక! దశరథ రాజ తనయ!

62 . పద్మ నాభుని మీద పాటలు పాడుడీ - భవ బంధములు బాయు భద్రమగును
కమలా మనో నాథు కన్నుల జూడుడీ - నేత్రముల్ గల్గు ఫల మెగడి యుండు
శ్రీ గదా ధరు సేవ జేయు డెల్లప్పుడు - రోగముల్ దొలగి యారోగ్య మగును
కోదండ రాముని కోరి భజిoచుడీ - శత్రు నాశనమగు సమ్మతముగ

నిట్టి లీలావ తారునీ యీశు హరుని - బలుని తమ్ముని గోపాల బాల విభుని
పరగ నుతియించి సంపూర్ణ పదవి గోనుడి - రామ! తారక! దశరథ రాజ తనయ!

63 . పారెడి పారెడి భావ మరదికి బండి - ద్రోలి నన్నను వెన్న దొంగ వాని
గొల్ల ముద్దుల చిన్న గుబ్బెతలను గూడి - విహరించు గోపికా వినుత కృష్ణు
అడవి ఎంగిలి మేత యేమంత బోకుండ - ఎత్తి మ్రింగిన యట్టి యేపుకాని
తన సాటి వారల తగు బాలురను గూడి - పామును మర్దించు భవ్య చరితు

దేవు నాశ్రిత ధేనువు దేవ దేవు - జగములన్నియు బుట్టించు సంహరించు
పొసగ రక్షించు వాని నా బుద్ధి దలతు - రామ! తారక! దశరథ రాజ తనయ!

64 . కౌసల్య సుత రాము కరుణా సముద్రుని - గంగాది నది పాద కమల యుగళు
ఖండేందు ధర చాప ఖండను - జగదేక మండను బ్రహ్మాది మౌని వంద్యు
తాట కాంతకు రాము దైత్య సంహారకు - ముని యాగ రక్షకు మోహనాంగు
పరశు రాముని గర్వ భంజను లోకైక - రంజను రఘు రాము రాజ మౌళు

నెపుడు సేవింతు కీర్తింతు నేర్పుతోడ - బుద్ధి గలిగిన నీదగు పుణ్య పదము
గని ప్రమోదింప వలయును కష్ట పడక - రామ! తారక! దశరథ రాజ తనయ!

65 . ఏల సేవింపరో యేల భావిమ్పరో - శ్రీ రామ నామంబు చిత్తమందు
మాటలాడుచునైన మరచియైననుగాని - యెప్పుడు నైనను యెరుక నైన
దివము లందైనను తివిరి రాత్రులనైన - సంధ్య వేళల నైన సందడైన
భ్రమత చే నైనను భయము నొం దైనను - నోపక నైనను నొప్పి నైన

సకల లోకాధి నాథుని సర్వ సాక్షి - నాది దేవుని చిన్మయా నంద మూర్తి
బుద్ధి దలచిన దురితముల్ పోవు టరుదె - రామ! తారక! దశరథ రాజ తనయ!

రామ తారక శతకము 12

56 . మాయల వాడవే మాయలన్నియు జూప - జలధులన్నియు మాయ జనులు మాయ
సూర్యుండు నీ మాయ చుక్కలు నీ మాయ - యింద్రుండు మాయ చంద్రుండు మాయ
మెరయు నగ్నియును మేఘంబులును నీ మాయ - యురుములు నీ మాయ మెరుపు మాయ
వర్ష ధారలు మాయ వాన కాలము మాయ - చలి కాలమును మాయ చలియు మాయ

యిట్టి మాయలు గట్టిగా నుర్వి నిలిచి - జనులకెల్లను గర్వము కలుగ జేసి
జగతి నడుపుదు వీరీతి శాశ్వతముగ - రామ! తారక! దశరథ రాజ తనయ!

57 . నీట మీనములోన నీచ వృత్తిని జొచ్చి - సోమకు జంపిన సుభగ రామ
తలలేని వాడవై తగ కొండ మోసిన - పతిత పావన బిరుదు పద్మనాభ
మిట్ట రోమంబుల మేదిని మూతితో - ద్రొబ్బుచు విహరించు దుష్ట హరణ
సగము సిమ్గంబవై జగదపకారుని - యుదరంబు భేదించు నురగ శయన
తిరిపెపు వాడవై మురియుచు గొడ్లంట - తిరుగుచు హాలివై తివిరి గొల్ల

తనువు గైకొని వ్రతముల తొలగ జేసి - గణుతి కెక్కిన శతకోటి కోటి మదన
మోహనాంగ దయానిధీ ముద్దులయ్య - రామ! తారక! దశరథ రాజ తనయ!

58 . కేశవదేవుని కీర్తనానలము చే - కలుషాటవుల నెల్ల గాల్చవచ్చు
వాసుదేవ స్మరణ వారధి చే భవ - వార్థి దాటగ వచ్చు వసుధ లోన
శ్రీ రామ దేవుని చింతన జేసితే - పాప సంఘముల భంజింప వచ్చు
పద్మనాభ స్తోత్ర భవ్య కుఠారిచే - దురిత వనాటుల ద్రుంచ వచ్చు

గాన కుమతులు మిమ్ముల గానలేక - వెర్రి త్రోవల బోదురు వెరపు లేక
తలచి సేవించు వారికి కలదు పదవి - రామ! తారక! దశరథ రాజ తనయ!

59 . మహిలోన పొట్టకై మానవ హీనుని - వెంటనే దిరుగుచు వెర్రి బట్టి
నటువలె రాక్షసి యంటిన కైవడి - గ్రహము బట్టిన రీతి కష్ట మతిని
అడుగబోయిన వారలదలించి పొమ్మన్న - గద్దించి తలవంచి కళ్ల నీళ్ళు
గ్రుక్కుచు మదిలోన సొక్కుచు నటు మీద - నిను జేరు కొందురు నిజముగాను

దీన జన మందిరాంగణ దేవ భూజ - వెనుక కడ తేర జూతురు వేడ్క మీర
అట్టి నిన్నును సేవింతు నహ రహమ్ము - రామ! తారక! దశరథ రాజ తనయ!

60 . ఎందుల కేగిన నే పని జేసిన - చలమున నైనను చనువు నైన
బంగారు పని నైన శృంగారముల నైన - సుద్దుల నైనను ముద్దు నైన
యాత్రల నైనను రాత్రుల నైనను - నుపవాసములనైన నుబ్బి యైన
జపముల నైనను తపముల నైనను - కలుగదు మీ దివ్య ఘన పదంబు

భక్తి జే నిన్ను దలచిన భాగ్యవంతు - లిందు నందును వేడుక తోడ నుండి
ప్రబలుదురు గాన ననువుగా పంకజాక్ష - రామ! తారక! దశరథ రాజ తనయ!

రామ తారక శతకము 11

51 . చెడిపోక నామాట చిత్త మందున్చుడీ - దేవదేవుని మహా దేవు జపము
నియమంబు తో నైన నేర్పు తో నైనను - భయముతో నైనను భక్తి నైన
శక్తి తో నైనను యుక్తితో నైనను - శాంతమ్ముతో నైన సరసమైన
రాకపోకల నైన రమ్యంబుగా నైన - నాట పాటల నైన నలసి యైన

సొక్కి యైనను సొమ్మ సిల్లైన గాని - ఒంటినైనను గుంపుగూడైన గాని
జేసి కైవల్య మందుడీ సిద్ధము గను - రామ! తారక! దశరథ రాజ తనయ!

52 . శ్రీ జానకీ నాథ శ్రీ రామ గోవింద - వాసుదేవ ముకుంద వారిజాక్ష
శ్రీ రంగ నాయకా శ్రీ వెంకటేశ్వరా - ప్రద్యుమ్న యనిరుద్ధ పంకజాక్ష
శ్రీ రుక్మిణీశ్వరా శ్రీ హృషీకేశ్వరా - నారాయణాచ్యుతా నారసింహ
శ్రీ రమా వల్లభా శ్రీ జగన్నాయకా - శ్రీధరా భూధరా శ్రీనివాస

రామ జయరామ రఘురామ రామ రామ - యనుచు దలచిన నామము లాత్మ యందు
కష్టములు దీర్చి రక్షించు గారవించు - రామ! తారక! దశరథ రాజ తనయ!

53 . కలవాడనా నీవు కన్నుల జూడవు - నీ బంటు బంటును నీరజాక్ష
చెడ్డవాడని నన్ను సరకు జేయ వదేమొ - పతితపావన బిరుదు పద్మనాభ
వీడెవ్వడని నన్ను విడనాడి నొమ్పకు - కరుణా సముద్ర యో కమల నయన
వేరు జేసియు నన్ను వెలితిగా జూడకు - గోపాల భూపాల గొప వేష

ఆది దేవ పరంధామ యవ్యయాత్మ - శ్రీ మనో నాథ శ్రిత పోష శ్రీనివాస
కాచి రక్షించు మిక నన్ను కామ జనక - రామ! తారక! దశరథ రాజ తనయ!

54 . చిన్ని ముద్దుల యన్న చిన్నారి పొన్నారి - సుర భూజమా రార సుందరాంగ
నను గన్నయా నీకు నేనన్యుడను గాను - నవ్వుల సేయకు నాగ శయన
దిక్కు మాలిన నన్ను దేవరవై బ్రోవు - చక్కని నాపాలి చక్ర పాణి
అక్కరతో నన్ను నాదరించుము వేగ - నిక్కంబు నీవాడ నీల వర్ణ

అనుచు వేడితి రక్షించు మరసి నన్ను - నెంత లేదని నీ మది నెంచ వలదు
కరుణ జూడుము నా మీద కామ జనక - రామ! తారక! దశరథ రాజ తనయ!

55 . యెంత నే వేడుదు నెంతని దూరుదు - నెంతని భాషింతు నేమి సేతు
యెంతని చింతింతు నెంతని భావింతు - నెంతని సేవింతు పంత మలర
ఎంతెంతనగ వశమె ఇందిరా రమణ నీ - సచ్చిదానంద సౌందర్య మహిమ
చెప్పను జూడను చెవుల వినంగను - శక్యమెవ్వారికి స్వామి నీదు

వేష భాషల వర్ణింప వేయి నోళ్ళ - శేషునకునైన వశమౌనె శ్రీనివాస
గాన మనుజుండ వర్ణింప నేర నయ్య - రామ! తారక! దశరథ రాజ తనయ!