జహ్నుమునీంద్రనందినీ విజయతే

 

వాచాలం వికలం ఖలం శ్రితమలం కామాకులం వ్యాకులం 

చండాలం తరళం నిపీతగరళం దోషావిలం చాఖిలం 

కుంభీపాకగతం తమంతకకరా దాకృష్య క స్తారయే 

న్మాత ర్జహ్నుమునీంద్రనందిని తవ స్వల్పోద బిందుమ్ వినా. 

                                                                   - మహాకవి కాళిదాసు 

విజయతే త్రిపథగే భాగీరథీ

 

కాకై ర్నిష్కుషితం శ్వభిః కబళితం గోమాయుభి ర్లుంఠితం 

స్రోతోభి శ్చలితం తటాంబు మిళితం వీచీభి రాందోళితం 

దివ్యస్త్రీకరచారుచామరమరుత్సంవీజ్యమానః సదా 

ద్రక్ష్యేహం పరమేశ్వరి త్రిపథగే భాగీరథీదం వపుః.

                                                       - మహర్షి వాల్మీకి 

గంగే ప్రసీద

 

భగవతి తవ తీరే నీరమాత్రాశనోహం

విగతవిషయతృష్ణః కృష్ణ మారాధయామి    

సకలకలుషభంగే స్వర్గసోపానసంగే  

తరళతరతరంగే  దేవి గంగే ప్రసీద.

                         - ఆది శంకరాచార్య 

నిజజలే మజ్జజ్జనోత్తారిణీ

 

విష్ణో స్సంగతికారిణీ హరజటాజూటాటవీచారిణీ

ప్రాయశ్చిత్తనివారిణీ జలకణైః పుణ్యౌఘవిస్తారిణీ 

భూభృత్కందరదారిణీ  నిజజలే మజ్జజ్జనోత్తారిణీ 

శ్రేయస్సర్గవిహారిణీ విజయతే గంగా మనోహారిణీ.

                                              -  మహాకవి కాళిదాసు 

జయతు జయతు గంగే

 

త్వత్తీరే తరుకోటరాంతరగతో గంగే విహంగో వరం 

త్వన్నీరే నరకాంతకారిణి వరం మత్స్యోథవా కచ్ఛపః 

నైవాన్యత్ర మదాంధసింధురఘటాసంఘట్టఘంటా రణ 

త్కారత్రస్తసమస్త వైరివనితాలబ్ధస్తుతిర్భూపతిః .

                                                   -  మహర్షి వాల్మీకి 

విజయతే గంగా మనోహారిణీ

 

శైలేంద్రా దవతారిణీ నిజ జలే మజ్జజ్జనోత్తారిణీ 

పారావారవిహారిణీ  భవభయశ్రేణీసముత్సారిణీ 

శేషాహే రనుకారిణీ హరశిరోవల్లీదళాకారిణీ 

కాశీప్రాంతవిహారిణీ విజయతే గంగా మనోహారిణీ.

                                                - ఆదిశంకరాచార్య   

గంగే దేవి నమోస్తుతే

 

గంగాతీర ముపేత్య శీతలశిలా మాలంబ్య హైమాచలీం 

యైరాకర్ణి కుతూహలాకులతయా కల్లోలకోలాహలః 

తే శృణ్వన్తి సుపర్వపర్వతశిలాసింహాసనాధ్యాసిన 

స్సంగీతాగమ శుద్ధసిద్ధ రమణీ మంజీర ధీర ధ్వనిమ్.

                                                       -మహాకవి కాళిదాసు 

భాగీరథీమ్ ప్రార్థయే

మాత శ్శైలసుతాసపత్ని వసుధాశృంగారహారావళి 

స్వర్గారోహణవైజయంతి భవతీం భాగీరథీం ప్రార్థయే 

త్వత్తీరే వసత స్త్వదంబు పిబత స్త్వద్వీచిషు ప్రేంఖత 

స్త్వన్నామ స్మరత స్త్వదర్పితధియ స్స్యాన్మే శరీరవ్యయః 

                                               

                                                  -మహర్షి వాల్మీకి 

నమామి గంగే

 బ్రహ్మాండం ఖండయంతీ  హరశిరసి జటావల్లి ముల్లాసయంతీ 

 స్వర్లోకా దాపతంతీ కనకగిరి గుహా గండ శైలాత్ స్ఖలంతీ 

 క్షోణీ పృష్ఠే లుఠంతీ దురితచయచమూం నిర్భరం మర్దయంతీ 

 పాథోధిం పూరయంతీ సురనగర సరిత్పావనీ నః పునాతు 

                                                         -ఆదిశంకరాచార్య