హనుమంతుఁడు రావణ భవనమున సీతను వెదకుట
ఆ.వె.కొంతసేపు గెంతి కులికి వానర మణి
స్థిమిత మొంది తిరిగి చింతఁ జేసె
నీమె సీత యైన యెట్లుండు నీ గతిఁ
బతినిఁ బాసి యామె పరమ సాధ్వి. 11- 1
మ.
ఎంత మహాపచార మిది! యింత విచక్షణ లేక శయ్యపై
యింతిని సీతగాఁ దలచి తెంతటి మూర్ఖుఁడ! స్వామి దూరమై
యింత విలాసభోగముల నే గతి సాధ్వి ధరిత్రిపుత్రి ని
శ్చింత గతిన్ సుఖించు? నని చింతను దేలె కపీశుఁ డయ్యెడన్. 11- 2
శా.
పానీయంబులు ద్రావునా? కుడుచునా? భాషించునా? శయ్యపై
మేనున్ వాల్చున? చందనం బలఁదునా? మేలైన భూషాళి మై
నూనన్ జాలున ? భోగముల్ బుడుకునా? యూహించునా యింద్రుఁడే
యైనన్ రాముని దక్క యన్యు మదిలో? నా భూజ యిట్లుండునా? 11- 3
కం.
అని దలచి కపివరేణ్యుఁడు
జనెఁ దిరుగగఁ బానశాల జానకి నరయన్
గనె లలన లాడి పాడగ
తను లలయగ మత్తులోనఁ ద్రావి పరుంటన్. 11- 4
తే.గీ.
రూప సల్లాప శీలుర, నౌపయికపు
గీత భావార్థ భాషులఁ బ్రీతి తోడ
సమయమునకైన భాషణ ల్సలుపు స్త్రీల
బొంది శయనించు రావణు పొంక మరసె. 11- 5
ఆ.వె.
ఆలశాల లోన నాఁబోతు రీతిని,
నడవి మధ్యలోన నాఁడు కరుల
మధ్యఁ దిరుగు నట్టి మదకరి వోలెను
నెగడె రావణుండు నిద్ర లోన. 11- 6
ఆ.వె.
పాన భూమిలోన బలు జంతు మాంసముల్,
బచ్చడులును, మరియుఁ బాయసాది
భక్ష్య భోజ్యములును, బానీయము, ల్బండ్లు
గానుపించెఁ గపికి మాను గాను. 11- 7
ఆ.వె.
పులుపు లుప్పు లున్న పులుసుల దోడను,
సగము తిని వదలిన *జంగలముల,
శర్కరాసవముల, సౌగంధ చూర్ణాల
పానశాల యొప్పె బాగు గాను. 11- 8
*మాంసముల
ఆ.వె.
చెదరి రాలియున్న యదరైన భూషల,
జిమ్మఁబడిన పూలఁ జిత్ర గతులఁ
బగిలి దొర్లి యున్న పాన పాత్రలఁ గూడి
పానశాల తీరు కాన నయ్యె. 11- 9
తే.గీ.
స్వచ్ఛ వస్త్రాలఁ బరచిన శయ్యలందు
నొండొరులు పెనవైచుక పండియున్న
స్త్రీల నిద్ర మై మరచి నెచ్చెలుల వస్త్ర
ములను దుప్పటి వలె దాల్చు ముదితల గనె. 11- 10
కం.
చల్లని గంధపు వాసన,
పుల్లని మద్యముల పొలుపు పువ్వుల తావుల్,
ద్రెళ్ళెడి ధూపపు వలపుల
నల్లన వాయువులు వీచె నంతట యచటన్. 11- 11
కం.
హనుమంతు డిట్టు లసుర స
దనమునఁ బ్రతి యంగుళమును దరచి వెదుకగా
ననబోడు లెందరో యటఁ
గనుపించిరి కాని సీత కనఁబడ దాయెన్. 11- 12
తే.గీ.
అట్టి స్త్రీలను జూచిన హనుమ మదిని
ధర్మ లోపము జరిగిన *తలకు గలిగె
నన్య కాంతలఁ జూచిన యఘము సోకె
ననుచు మదిని చింతిలసాగె నాతఁడంత. 11- 13
* శంక
తే.గీ.
అపుడు మరియొక చింతన మంకు రించె
స్వేచ్ఛ నిదురించు రావణ స్త్రీల నేను
కామదృష్టితో గమనించఁ గడగ నైతి
నే వికారమ్ము జనియింప నీయ కుంటి. 11- 14
కం.
ఏ జాతి ప్రాణి నైనను
నా జాతి ప్రాణు లందు నరయుట తగు గా
భూ జాత నాతి గద స్త్రీ
జాతిని నే వెదుక టొప్పు *శమల మ్మగునే? 11- 15
*పాపము
కం.
కనుకను నిర్మల హృదితో
జనకజకై వెదకి తేను సాకల్యముగా
దనుజ విభు సౌధమందున
గన నైతిని సీత ననుచుఁ గపి దలపోసెన్. 11- 16
ఆ.వె.
మరల మరల వెదకె మారుతి యచ్చోటఁ
బుడమిపట్టి నరయు పూన్కి తోడ
దివిజ నాగ యక్ష దివ్య కన్యలు దక్క
దొరక దాయె నామె నరయు వీలు. 11- 17
తే.గీ.
పట్టు వదలని పావని యెట్టు లైన
ధరణిజాతను గనుఁగొను తలపు తోడ
పానభూమిని విడనాడి బయలుదేరె
నితర తావుల వెదుకగ నిష్ఠ తోడ. 11- 18