🌸🌼🌸🌼🌸🌼🌸🌼🌸🌼
చకచక సాగుచుండె నదె చాయమగండు విలాస దీప్తులన్
మకరము వైపు ధాత్రికి సమాదర మొప్పెడి యుత్తరాయణ
ప్రకటిత పుణ్యకాల మిడి భాసిలఁ జేసెడి దివ్య దీక్షతో
సకల చరాచర ప్రకృతి సంతస మొందుచు నంజలించఁగన్.
***
మకర రాశికిఁ జేరె మార్తాండు డల్లదే
............ఠీవిగా వినువీధి ఠేవ మీర
మకరసంక్రమణమ్ము మరల వచ్చినదని
............పితృదేవ గణములు ప్రీతిఁ జెందె
రంగవల్లుల దీర్చి రంగుగా రమణులు
............స్వాగతమ్మన వచ్చె పౌష్యలక్ష్మి
భోగిపండ్లను బోయ, బొమ్మకొల్వులు దీర్చ
............పేరటాండ్రందరు జేరినారు
గంగిరెద్దులు గొబ్బియల్ ముంగిళులను
ప్రభలఁ జిందించె రైతుకు ప్రమదమాయె
పల్లె టూళ్ళెల్ల పర్వమై పరవశించె
రమ్య రాగాల డోల సంక్రాంతి హేల!
🌸🌼🌸🌼🌸🌼🌸🌼🌸🌼
