బ్లాగ్ గురు ప్రశంస

వలబోజ వంశ మనగా
నిలలో నొక క్షీర జలధి! ఇదిగో కను డా
జలధిని ప్రభవించిన దీ
నెల రాడ్బింబమ్ము 'జ్యోతి' నెలవై కళకున్!
^^^^^^^^^^^^^^^^^^^^^^^^^^^^^^^^^^^^^^^^^
బ్లాగుల శిల్పి వీవు పలు బ్లాగుల రూపును చక్క దిద్ది బా-
గోగులు చూచు చుండెదవు యోర్మిని వాటికి కొంగు బంగరై,
బ్లాగులు వృద్ధి చెందెడిని బాగని మెచ్చగ తోటి బ్లాగరుల్
'బ్లాగుల జ్యోతి'వౌ తెలుగు బ్లాగ్ గురు నీకు శతాభి వందనల్!
^^^^^^^^^^^^^^^^^^^^^^^^^^^^^^^^^^^^^^^^^
అంతర్జాలము నందున
నెంతో నేర్పొప్ప నీవు యెంతో మందిన్
సుంతన్ విసుగున్ జెందక
సొంతమ్మౌ బ్లాగు గలుగ జూతువు గాదే!
^^^^^^^^^^^^^^^^^^^^^^^^^^^^^^^^^^^^^^^^^
బహుముఖ ప్రజ్ఞల జూపుచు
నహరహమును బ్లాగులందు నానందముగా
విహరించుచుండు జ్యోతీ!
రహియింపుము మంచితనము రాణింపంగాన్!
^^^^^^^^^^^^^^^^^^^^^^^^^^^^^^^^^^^^^^^^^
బాగు బాగు జ్యోతి! బహు బాగు నీ సేవ!
బ్లాగు లోకమందు పరిఢవిల్లె!
ఆయువిచ్చు, దేవు డారోగ్యమున్ యిచ్చు,
వదలకుండు మతిని వాణి యెపుడు!
********************************************************

గురు స్తుతి

కీర్తి శేషులు కందుకూరి భాస్కర శాస్త్రిగారిది కోనసీమ లోని మోడేకుర్రు గ్రామం.
ఆయన ఉభయ భాషా ప్రవీణులు. పాఠశాలలో తెలుగు పండితునిగా పనిజేసి రిటైరయ్యాక
రాజమండ్రిలో స్థిరపడ్డారు. ఆయనది చాల మెత్తని స్వభావం. దయార్ద్ర హృదయులు.
వయసుతో నిమిత్తం లేకుండా అర్థించిన వారందరికీ విద్యా దానం చేసేవారు.
సంస్కృతాంధ్రాలను చెప్పేవారు. ఉపనిషత్తులను, వేదమంత్రాలనూ సస్వరంగా నేర్పేవారు.
ఆయన అనారోగ్యంతో మంచం పట్టినా కూడా చదువు చెప్పడం మానేవారు కాదు.
తుది శ్వాస విడచే వరకూ విద్యా దానం చేస్తూనే ఉన్నారు.

ఆయన పరమ శివ భక్తులు. సూర్య నమస్కారాలు చెయ్యడంలో ఆయనకు
ఆయనే సాటి అని చెప్పేవారు.

ఆయన మహర్షిలా జీవితాన్ని గడిపి రాజమండ్రి లోనే పరమ పదించారు.

గురువుగారిని ౧౯౯౭ సం.లో శిష్యులందరూ కలసి స్వర్ణకంకణంతో సన్మానించారు.
ఆ సందర్భంలో ఈ శిష్య పరమాణువు వ్రాసి చదివిన పద్యాలు యివి.

శ్రీ గురుభ్యో నమః
===========

కం. దక్షిణ కోరని గురువుకు
అక్షర పుష్పముల దెచ్చి యర్చన చేతున్
సాక్షాత్తు ముగురు మూర్తులు
నక్షయమౌ కరుణ తోడ నాశాసింపన్.

ఆ.వె. కందుకూరి వంశ ఘన నభో మండల
భానుతేజ! పూజ్య! భాస్కరాఖ్య!
మిమ్ము సత్కరించు మేటి భాగ్యమ్మును
పొందినాము పూర్వ పుణ్య కతన.

సీ. అధ్యాపనమ్మునే యానందముగ నెంచి
ఛాత్రుల మలచిన స్రష్ట యితడు!
ఉపనిషత్సూక్తుల నుపదేశమును జేసి
యఘ నాశమొనరించు హరి యితండు!
అభివాద మాత్రాన నల్ప సంతుష్టుడై
విద్యల నిచ్చెడి విభుడితండు!
ధర్మానువర్తన మర్మమ్ము లెరిగిన
విమల చరిత్రుడౌ విప్రు డితడు!

తే.గీ. పరమ శివ పదాంభోరుహ భ్రమర మితడు!
భాస్కరానుగ్రహమ్మును బడసె నితడు!
సంస్కృతాంధ్రమ్ము లందున చతురుడితడు!
'గురువు'పదమునకే గొప్ప పరువితండు!

ఆ.వె. గురువు గారి చెంత కూర్చున్న చాలును
స్వరము పట్టువడెడి వరము దొరకు!
వారు కరుణ తోడ నేరుపు మంత్రముల్
భావి పదిల పరచు బాట యగును!

ఆ.వె. విద్య నేర్పుడన్న 'విత్త మేమిత్తువు'
'వలను కాదు' 'స్వరము పలుక లేవు'
యిట్టి పల్కు లెపుడు యెరుగము మీ నోట
పాఠములను చెప్పు పాటె కాని!

ఆ.వె. చెప్పువారు లేక చింతింతు రెందరో
చెప్ప గలను నేను చేర రండు
అనెడి గురువు గారి కాయుష్షనంతమై
శిష్య కోటి వృధ్ది చెందు గాత!
_ _
_: *** :_

శారదా స్తుతి

శ్రీ శారదాంబాయై నమః
*****************


భువనేశ్వరి నీ తత్త్వము
నెవ రెరుగుదు రిద్ధరిత్రి నిసుమంతేనిన్
పవలున్ రేయియు ప్రాణుల
జవ సత్త్వము లీవు గాదె సత్యము వాణీ!
****************************************
రసనను నీ వుండిన దు-
ర్వ్యసనమ్ములు తొలగి పోవు వ్యక్తుల కెల్లన్
అసలీ సృష్టిని మనుగడ
పొసగునె నీ కరుణ లేక పొందుగ వాణీ!
****************************************
కవులెందరొ నీ కరుణను
చవులూరగ నింపినారు షడ్రుచులొప్పన్
ప్రవిమల కావ్యము లెన్నియొ
సువిశాల ధరిత్రి నెల్ల జూడగ వాణీ!
****************************************
విద్యల నిమ్మా దయతో
పద్యంబుల జెప్పగల్గు పటుతర శక్తిన్
సద్యః స్ఫూర్తిని యిమ్మా
హృద్యంబయి బుధులు మెచ్చ నిమ్ముగ వాణీ!
*****************************************
శారద! నీ కటాక్షమున చక్కగ రాతికి పల్కు లబ్బెడిన్!
ధారగ కైత లయ్యెడిని ధారణ కోర్వని పామరాళికిన్!
నేరుగ పద్య గద్యముల నేర్పు లభించెడి నీ వసుంధరన్!
యారక నా కలంపు తడి యమ్మరొ! దీవెన లిమ్ము మ్రొక్కెదన్.
*****************************************
*****************************************