కన్ను చెవి ముక్కు నోరు,,,పదాలతో అన్యార్థం లో రామాయణ పరమైన పద్య రచన

కన్నులవిలుకాడు చిన్నవోవడె వీని
.....సౌందర్యమును గని సత్య మిదియ!
ముక్కుటమును దాల్చి మునివోలె గన్పట్టు
.....దాగునే వీని యందమ్ము దాన?
చెవిచేసుకొననైతి చిత్ర మెందుండెనో
.....యిన్నినాళ్ళుగ నిట్టి వన్నెకాడు?
నోరుకాచగ నింక నోపలే నిపుడె నా
.....వాంఛను ప్రకటించి వాలిపోదు

నితని బాహువు లందున వెత యడంగు
ననుచు రాముని గని శూర్పణఖ మది చెడి
కన్ను చెవి ముక్కు నోరుగా కాయమెల్ల
నందముగ మార్చుకొని వన్నెలాడి యాయె.

కన్నులవిలుకాడు: మన్మథుడు
ముక్కుటము: నారచీర
చేవిచేసుకొను: తెలిసికొను
నోరుకాచు: రహస్యముగా దాచు