ముత్యపు కాంతి నింపొదవెడు నొక మోము!
........విద్రుమాభమ్ముతో వెల్గునొకటి!
పసిడి కాంతుల తోడ భాసిల్లు వేరొండు!
........నీల మేఘఛ్ఛాయ నాలుగవది!
ధవళ వర్ణము తోడ తనరు నైదవ మోము!
........మూడు నేత్రము లుండు మోమునందు!
ఇందుబింబము కాంతు లీను కిరీటాన!
........తత్త్వార్థ వర్ణమ్ము తల్లి మేను!
అభయముద్రయు, నంకుశ, మబ్జయుగము,
శంఖ, చక్ర, కపాల, పాశములు, గదయు
నష్ట భుజముల దాలిచి, హంస పైన
విహరణము జేయు గాయత్రి విశ్వ మేల!
ఉభయ సంధ్యల గాయత్రి విభవ మెన్ని
'భూర్భువస్సువ' యను మంత్రమును జపింప
నీమమున, సజ్జనుల కొంగు హేమ మగును!
వేదమాతకు నవరాత్రి వేళ నతులు!
No comments:
Post a Comment