మన్నించు దుర్గాంబికా!

మహిషాసురుని జంపి మహిని కాపాడిన
........కనకదుర్గా! నీకు కరము నుతులు!
చండముండుల ద్రుంచి జగము లేలిన తల్లి!
........కాళికాంబా! నీకు కైమొగిడ్తు!
భండవిశుక్రుల ప్రాణముల్ దీసిన
........దైత్యాంతకీ! నీకు దండ మిడుదు!
మధుకైటభుల బట్టి మర్దించి చంపిన
........చండికా! జేజేలు చాల జేతు!

సృష్టి సంహారణక్రియన్ శివుని తోడ
లయమొనర్చుచు లోకాల భయము గొల్పి
జగములను పునఃసృష్టించు జనని వీవు!
తల్లి వందన మొనరింతు దయను జూడు!

చెడుపై మంచికి నెన్నడున్ విజయమౌ సృష్ట్యాదినుం చెన్నగా
కడగండ్లొందుచు ధాత్రిపై జనులు దుఃఖాంబోధిలో నీదగా
వడి నీ వుద్భవ మంది దుష్ట తతులన్ వజ్రాయుధోపేతవై
మడియం జేయుదు వన్న నానుడి సదా మన్నించు దుర్గాంబికా!