జిలేబీ తయార్

మినప గుళ్ళు తెచ్చి మేలి రకమ్మును
నీటిలోన నాన నిచ్చి పిదప
పిండి రుబ్బవలయు నండి మెత్తగ దాని
పులియ బెట్ట వలెను పూటబాటు.

పంచ దార దెచ్చి బాణలిలో పోసి
నీరు జేర్చి సన్న నెగడు మీద
లేత పాక మైన రీతిని కానిచ్చి
ప్రక్క నుంచవలయు పదిలముగను.

నూనెను మూకుడు లోనిడి
మానుగ స్టౌ పైన బెట్టి మరిగిన పిదపన్
పూనిక పులిసిన పిండిని,
పానకమును ప్రక్కనుంచి పళ్ళెము లోనన్,

కొబ్బరి చిప్పకు కొద్దిగ
దబ్బనమున చిల్లు జేసి దానిలొ పిండిన్
గొబ్బున నుంచిన పిమ్మట
నబ్బురమగు చుట్ట వోలె నయ్యది దానిన్,

కాగు నూనె లోన కమ్మగ వేయించి
వేడి వేడి చుట్ట వేయ వలెను
పాకమందు నాన బాగుగా తయ్యారు
తీయనౌ జిలేబి తినగ పొండు.