కరిరాజ వదనుండు కరిరాజ వరదుడు
............ముచ్చట లాడుచు మురియు వేళ!
నాగ సూత్ర ధరుడు నాగారి వాహను-
............డుల్లాస హృదయులై యున్న వేళ !
ఆది పూజ్యుండును నాదిజు తండ్రియు
............భక్తావనమ్మున బరగు వేళ!
ఏక దంతుండు లోకైక నాథుండును
.............విష్ణు రూపమ్ముల వెలయు వేళ!
ఏమి చవితిని నష్టమి నిడుములేమి?
అను దినమ్మును శుభములు తనరవేమి?
విఘ్నములును విపత్తుల బెడద యేమి?
లోకముల కెల్ల పండుగ గాక యేమి?
No comments:
Post a Comment