ఆదినాదమ్ముగా నవతరించిన గీత-
........మానంద సంధాయ మైన గీతి!
పంచాక్షరికి ముందు పల్లవించెడు గీత-
........మాది శంకరున కామోద గీతి!
ఆముష్మికము గోరు నా ముముక్షుల గీత-
........మాగమమ్ముల కమ్మ యైన గీతి!
జపతప యజ్ఞాది సర్వ కర్మల గీత-
........మష్టసిద్ధుల నిచ్చు నమర గీతి!
నాట్య సంగీత శాస్త్రాల నవ్య గీతి!
భారతీయుల సంస్కృతి ప్రాణ గీతి!
అన్ని జీవులలో మ్రోయు హంస గీతి!
ప్రణవ నాద! మోంకారము! భవ్య గీతి!
No comments:
Post a Comment