నల్ల కలువ మోము, పిల్లన గ్రోవియున్,
ఘల్లుఘల్లు మనెడు కాలి గజ్జె,
చిట్టిపొట్టి యడుగు లిట్టట్టు వేయుచు
నందు నిందు నాడు నందు పట్టి!
ఆవు పొదుగు చెంత 'ఆ' యని నోరుంచి
క్షీర మాను నందశిశువు వదన
బింబ రుచుల గాంచి బిడియమ్ముతో దాగె
మబ్బు వెనుక చందమామ గనుడు!
చేత కొంత వెన్న, మూతిని మరి కొంత,
మెడను పులి నఖమ్ము మెరయుచుండ
బెట్టు సేయు ముద్దు బెట్ట రావే యన్న,
చుట్టు ముంగమూతి సున్న వోలె!
పల్లె లోని పడుచు పిల్లల చూపులు
చిన్ని కృష్ణు పైనె యున్న వంచు
దృష్టి తీసివైచు దినదినమ్ము యశోద
వన్నె తగ్గకుండ వెన్న దొంగ!
రారా! నందకుమారా!
రారా! నవనీత చోర! రార! మురారీ!
రారా! నగధర! నాకీ
వేరా! శరణంటి పదము లిమ్ముగ కృష్ణా!
No comments:
Post a Comment