భాద్రపదమ్మునందు మము భద్రతఁ జూడుము భద్రమూర్తివై
ఛిద్రములాయె మా బ్రదుకు చిత్రములెల్లను నిత్యకృత్యమౌ
క్షుద్రపు రాజకీయముల సోకుల మూకలఁ జిక్కి శల్యమై
భద్రగిరీశ! దాశరథి! భక్త జనావన కల్పవృక్షమా!
నిద్రయు దూరమాయె నవినీతి నిశాచర ఘోర చేష్టలన్,
భద్రత మాసిపోయినది, భద్రగిరిన్ కొలువుండి చూపినన్
ముద్రను భీతి వీడుమని మోదమె? పూనికఁ బూని యీ మహో-
పద్రవ మాపకున్న మరి, భావ్యమె? రామ! దయానిధానమా!
చిద్రూపుండవు చిన్మయుండవు సదా శ్రీ జానకీవల్లభా!
సద్రాజాన్వయ వార్థి సంభవ శశీ! సంహారముంజేసి యా
క్షుద్రుండౌ దశకంఠు, డస్సితివొకో! చూడంగదే మమ్మికన్
నిద్రాసక్తిని వీడి కూల్చగదవే నీకోల నా దైత్యులన్.
No comments:
Post a Comment