అపరాజితుడు

అపరాజితా వృత్తము

నలుపు నరసి గుండె నల్గెను బాధతో
నలుపు నణచి వేయ నాకిది వేళయౌ
నలుపు గొలచు వాని నల్పెద నల్లిలా
నలుపు వెఱచి పోవ నాకిక దవ్వుగా.

నలుపున విలపించు న్యాయము బేలయై
నలుపున కుశలమ్ము నవ్వుల పాలగున్
నలుపున జన మెల్ల నల్గెడి నార్తితో
నలుపును తరుమంగ నావిధి లేచెదన్.

నలుపుల పనిబట్ట నా పనిముట్లతో
సలిపెద సమరమ్ము సవ్వడి లేకనే
సలుపగ తనువెల్ల చావుకు సిద్ధమై
కలుగుల మరుగున్న కర్వము లేడ్వగా.

నలుపున కిక మూడె నమ్ముడు సత్యమే
పలువురు సుఖియింప భాగ్యము లూరెడిన్
నలుగురు కలవండి నమ్మిక నాయెడన్
విలువలు చిగురించు వేగమె యెల్లెడన్.

జనములు నడువంగ సంతస మొప్పగా
తన యెడ గురితోడ తాముగ వెంటనే
చనె నదె సమరమ్ము సల్పగ నల్పుపై
మన ప్రియతమ నేత మాన్యత మించగా.