గ్రామదేవతలు

శ్రీ గురుభ్యోనమః 🙏 శ్రీ మాత్రే నమః 🙏 

ఉ. శ్రీ వసుధాఖ్యవై ధరను శ్రీల నొసంగెడు లక్ష్మివై మనో

భావము లేలు బ్రాహ్మివయి ప్రాణుల యందలి జీవ శక్తివై

పావన భారతావనినిఁ బల్లె జనమ్ములు మ్రొక్కు గ్రామపున్

దేవతవై రహించెదవు దీప్తులఁ జిన్మయరూపిణీ! శివా!

ఉ. మాయను నేర్వరీ జను లమాయకు లెల్లఱు పల్లెపట్టులన్

సాయము గూర్తు గొల్వగుచు జబ్బుల బెంచెడి వాయు ధూళి పా 

నీయ చరాసుభృత్పటలి నిగ్రహణార్థము గ్రామ సీమలన్ 

బాయక యంచు జాలి గొని పాలన జేసెడి తల్లికి న్నతుల్

సీ. పుంతలో ముసలమ్మ ప్రోవవే మా యమ్మ 

..పిలిచిన పలకవే కలుములమ్మ

ఒనుములమ్మా మమ్ము  నొకకంట గనిపెట్టు 

.. కాచి రక్షించవే కాసులమ్మ 

బాపనమ్మా పిల్ల పాపల గాపాడు 

..యేలవే దయతోడ నెరుకలమ్మ

తలుపులమ్మా మాకు గలఁతలు రానీకు 

..మైసమ్మ చూడవే మంచిగాను  

తేగీ. కోట సత్తెమ్మ దుర్గమ్మ కొండతల్లి 

రావులమ్మ సోమాలమ్మ  రాజులమ్మ

దానవయ్యమ్మ పోశమ్మ తల్లులార

వందనాలివె గ్రామదేవతలు మీకు.

తేగీ. అమ్మవారిని దర్శించి అమ్మ మమ్ము 

చల్లగా జూడు మని మ్రొక్కి సన్నుతింప 

గరుణ వెల్లువౌ దృక్కుల గాచు నెపుడు 

గ్రామదేవత పల్లెల ప్రాణశక్తి. 

 

 

నమామి దేవి నర్మదే 🙏🙏

 శ్లో.

అలక్ష లక్ష లక్ష పాప లక్ష సార సాయుధమ్ | 

తతస్తు జీవ జంతు తంతు భుక్తి ముక్తి దాయకమ్ | 

విరించి విష్ణు శంకర స్వకీయ ధామ వర్మదే | 

త్వదీయ పాదపంకజమ్ నమామి దేవి నర్మదే || 

-నర్మదాష్టకమ్

శంకర జయంతి 2024

 

నేడు శ్రీ శంకరుల జయంతి.

=====================

వేదో నిత్యమధీయతాం తదుదితం కర్మ స్వనుష్ఠీయతాం 

తేనేశస్య విధీయతామపచితిః కామ్యే మతిస్త్యజ్యతామ్ । 

పాపౌఘః పరిధూయతాం భవసుఖే దోషోఽనుసన్ధీయతా- 

మాత్మేచ్ఛా వ్యవసీయతాం నిజగృహాత్తూర్ణం వినిర్గమ్యతామ్ ॥

సాంగవేదమ్ములు సద్గురు కృప చేత

...చదువఁబడును గాక సంతతమ్ము

చదువఁబడిన వేద విదిత కర్మమ్ములు

....పాటింపఁబడుఁ గాక వదలఁబడక

వదలఁబడని కర్మ పరమాత్మ పూజను

...నిష్కామమైనదై నిలుపుఁగాక

నిష్కామ కర్మచే నిర్మలమై బుద్ధి

...వాంఛలు విడనాడఁబడును గాక

పాపరాశి దులపఁబడి పారుఁ గాక

భవసుఖమ్ము లనిత్య మన్ భావ మగుత

ఆత్మ తత్త్వమ్మునన్ వాంఛ యగును గాక

స్వగృహమును వీడి వడి వెళ్ళఁబడును గాక.

***

సఙ్గః సత్సు విధీయతాం భగవతో భక్తిర్దృఢాఽఽధీయతాం
శాన్త్యాదిః పరిచీయతాం దృఢతరం కర్మాశు సన్త్యజ్యతామ్ ।
సద్విద్వానుపసృప్యతాం ప్రతిదినం తత్పాదుకా సేవ్యతాం
బ్రహ్మైకాక్షరమర్థ్యతాం శ్రుతిశిరోవాక్యం సమాకర్ణ్యతామ్ ॥ 2॥

సజ్జనముల మైత్రి సమకూడఁబడుఁ గాక

...దేవుని యెడ భక్తి దిట్ట మగుత

శాంత్యాది మేలగు సంస్కార గుణములే

...అభ్యసింపఁ బడుచు నలరుఁ గాక

నిత్య నైమిత్తిక నిహితమై యుండియు

...కర్మ సన్న్యాసమ్ము గలుగు గాక

యోగ్యుడౌ విద్వాంసు డొడఁగూ డగుంగాక

...గురుపాదయుగసేవ గూడుఁ గాక

స్వపర భేద రహితుఁడును, సర్వమునను

నొక్కఁడై యుండియును నిండి చ్యుతి నెఱుఁగని

బ్రహ్మ మర్థింపఁబడుఁ గాక ప్రాఁతచదువు

పదము బాగుగాఁ జర్చింపఁబడును గాక.

(జగద్గురువుల ఉపదేశ పంచకము నుండి)

ఉగాది 24

సీ. త్యజియించ వాంఛలఁ దపము పండిన రీతి

... నాకు రాలిన చెట్ల ననలు దోచె

నిరుల సంకెలఁ ద్రెంచి యినుఁడైన విధమున

...శిశిరంపు జెఱ వీడి చెలఁగెఁ బ్రకృతి 

కావిపచ్చదనాల కలనేత చీరల

...వగ మావులెఱ్ఱ జొంపముల నొప్పె

శ్రావణమునఁ గ్రొత్త జంట లలరు గతిఁ

...గోయిలల్ జతకట్టఁ గూయ సాఁగె

తే.గీ. సొగసు లారిన దిశలకు వగలు హెచ్చె

మల్లె పొదరిళ్ళ ఘుమఘుమల్ వెల్లు వాయె

కదలి వచ్చెడి ఋతురాజు గద్దె నెక్క 

స్వాగతమ్మని పలుకరో సంతసమున.

ఉ. వచ్చెను నింపగా నవజవమ్మును ధాత్రి వసంతుఁ డల్లదే

మెచ్చి సమస్త జీవములు మించిన శోభలఁ దేజరిల్లెడిన్

జెచ్చెర షడ్రుచుల్ గలిపి చేసిన విందుల నారగించరే

విచ్చిన మానసమ్ములను వేడుక స్వాగత గీతిఁ బాడరే.

ఉ. క్రోధికి స్వాగత మ్మనరె గొప్పలు సెప్పుచు బీదసాద కా

రాధకులమ్ము మే మనుచు రాజ్యరమన్ జెరఁబట్టి సాధులన్ 

బాధలఁ బెట్టు దుష్టజన బాంధవు నింటికి సాగనంపు బెన్ 

గ్రోధముఁ బూనవే జనులఁ గూరిమిఁ జూడవె యంచు వేడరే

.

***

కాలమను దివ్య చక్రానఁ గదలెఁ జూడు

మరొక ఆకు మున్ముందుకు మహిత గతిని

కాల రూపేశునికి భక్తిఁ గేలు మోడ్చి

సలుప వలయును క్రోధికి స్వాగతమ్ము.

శివ శివ అనరాదా 2024

మత్తేభములు

శివనామమ్ము స్మరింపవేమి మనసా! చేఁదాయెనే మూఢ! ఆ 

శివపాదమ్ము సమీపమం దిడవె నీ శీర్షమ్ము భక్తాళువై   

భవపాథోధిఁ దరించు టన్నను మహా బాధాకరంబే కదా 

భవుఁ డన్నన్ గరుణాళు వండ్రు వినవే భావింపవే సర్వదా.

కరుణాళుండు గదా మహేశ్వరుఁడు సత్కల్యాణ సంధాయి శ్రీ 

చరణాబ్జంపుఁ బరాగమన్నఁ బడదా సద్భక్తులం జూడవా 

హర యన్నన్ గరు వెల్లఁ దీరును గదా ఆ మాత్రముం జేయవా 

కరిసర్పమ్ములఁ బుర్వు నేలి దయతోఁ గైవల్య మిచ్చెం గదా!  

మదనారిం గన మానసంబు జనదా మాయం దగుల్కొంటివా 

ముద మౌనా సుత బంధు మిత్ర ధనముల్ మూయించునా కన్నులన్ 

మదిలోఁ గ్రమ్మిన ప్రేమపుం బొరలు నీ మోక్షప్రదాతన్ భవున్ 

ముదమారన్ గన నీయవా తెలివితో మూఢత్వమున్ వీడవా?   

(శ్రీ దేవులపల్లి కృష్ణశాస్త్రి గారి గీతం స్ఫూర్తితో...)

మహాశివరాత్రి 2024

పరమేశ వృత్తము

( పరమేశునకు పంచోపచారములు )

***

లం పృథివీ తత్వాత్మనే గంధం పరికల్పయామి నమః

'అదితి' ప్రకృతి  మహద్యశా! భయనాశా!

హృదు'లం' దెలమి  వసించు హే స్మర నాశా!

పదము ల్విడువను ఛిన్నభానుజపాశా!

ఇదె 'గంధము'ను గ్రహింపుమీ పరమేశా!        1

హం ఆకాశ తత్వాత్మనే పుష్పం పరికల్పయామి నమః 

'గగనం'పు గుణము లింపుగా గల యీశా!

అగజాత హృదయచోర! 'హం'స! మహేశా!

సగ మేన బొదువు కొంటె జాయను  మోద

మ్ముగ నీ కిడుదును  'పుష్పము' ల్పరమేశా!      2

యం వాయు తత్వాత్మనే ధూపం పరికల్పయామి నమః 

'అనిలం'పు గుణ విరాజితా! ఫణిభూషా!

ఘన చారుతర మనోజ్ఞకాంతి సుదేహా!

జనతార్తిహర! జ'యం'త!  శంకర! ధూప

మ్ము'ను మూర్కొను మివె దండము ల్పరమేశా!      3

రం వహ్ని తత్వాత్మనే దీపం పరికల్పయామి నమః 

'అనలం'పు ప్రకృతి శోభితా! నిటలాక్షా!

జన'రం'జన! ప్రమధాది సంవృత! రుద్రా!

గుణిధారి! హర!  త్రినేత్ర! గోఘృత'దీప 

మ్ము'ను జూడుము ప్రణిపాతము ల్పరమేశా !       4

వం అమృత తత్వాత్మనే అమృతనైవేద్యం పరికల్పయామి నమః 

'అమృతా'త్మ! వరసుధాకరాశ్రిత శీర్షా!

హిమ'వం'త సదన  గౌరి హృన్నిలయా! నీ 

వమృతమ్ముగ మది నెంచుమా ఫల  'నైవే 

ద్య'మిదే దయ గొనరావయా! పరమేశా!          5

****

(పరమేశ వృత్తము .. స న జ భ గగ 10 యతి శక్వరి ఛందము 3452 వృత్తము

I I U I I I I U I U I I U U )

రామజన్మభూమి బాలరామ ప్రతిష్ట. 22-1-2024 సోమవారం

సీ. ఐదు శతాబ్దాల అవమాన భారమ్ము

...బాయుట యెపుడని పలవరింత

స్వాతంత్ర్య సిద్ధితో సఫలమౌ నని యెంచ

...మారెను దొర రంగె మరల చింత

సాధుల సంతుల సద్భక్తవర్యుల

...ఘన బలిదానాలు గలచు చింత

పుణ్యభూమిని న్యాయ మూర్తుల రూపాన

...ఫలియించె కల యని పులకరింత

తే.గీ.  బాలరాము డయోధ్యలో భవ్యమైన

మందిరమునందు భారత మాత యొడిని

పరవశించెడి శుభవేళ యరుగుదెంచె

నెంత ధన్యమో మన తర మెంత ఘనమొ.

ఉ. ఎంతటి భాగ్యమో మనది యెన్ని శతాబ్దులొ వేచి చూచినన్

సుంతయు ముందుకుం జరుగు సూచనలే కనుపట్టరాని య

ధ్వాంతము నందు భానుని ప్రభాకర రశ్ముల భాతి రామ భూ

కాంతుని జన్మభూమి చెఱ కాలముచెల్లి తదీయ దివ్యమౌ

ప్రాంతము నందు బాల రఘురాము మనోహర భవ్య దేవళం

బింతలు నింతలై వెలుఁగు లీనుచు నిల్చుట లెంచి చూచినన్

చింతలు దీరె నేటి కిఁక శ్రీ రఘురాముడు భారతావనిన్

వంతలు మాయ నేలుకొను బాయును రాక్షస పీడ జాతికిన్

సంతస మౌను భారత ప్రజావళి కెల్లెడలన్ శుభం బగున్.

తే.గీ. ఔ బలే రోజు బాలరా మాంఘ్రి ధూళి

యంట బులకించె నే డయోధ్యాపురమ్ము

సరయు నుప్పొంగె యెద లోన స్వామిని గని

భరతమాత కానంద బాష్పాలు రాలె.

ఉ. బాలుడె కాని యీ ప్రభువు భారతజాతికి గుండె చప్పుడై

కాల మదెంత మారినను కాపురుషుల్ చెలరేగిపోయినన్

లీలగనైన వీడక ధరిత్రి నయోధ్యను భక్తకోటినిన్

బాలన జేయుచుండు శశిభానులుఁ వెల్గెడు నంత కాలమున్.

కం. వందన మో రఘునందన!

వందన మో బాలరామ! వందన మీశా!

వందన మయోధ్యరామా!

వందన మో జానకీశ! వందనము ప్రభూ!