అమ్మల పండగ

ఉ. తొమ్మిదిరేల పండు గని తొమ్మిది యమ్మల బొమ్మ లింటిలో 

నిమ్ముగఁ బెట్టి రేయి కొక యేలఁ దలంచుచుఁ బువ్వఁ నిచ్చు పె

ద్దమ్మయు సొమ్ములమ్మ నుడులమ్మలుగాఁ గల యమ్మలందఱిన్

మమ్ములఁ జల్లగాఁ గనుడు మానక కొల్తు మటన్న లగ్గులౌ.

సరస్వతి - కాళరాత్రి

సరస్వతీ స్తుతి 

కమలహంస వృత్తము

న భ స న జ ర.. యతి 11

అనుపమంబగు రహి తోడ నవని భారమైన శుం 

భుని నిశుంభునిని వధింపఁ బొలిచి జ్ఞానరూపివై 

చెనటులం బలుకులఁ బ్రజ్ఞ సెలఁగ మాయఁ జేసి నా 

శనము జేసితివి కృపారసమయి శ్రీ సరస్వతీ!

****

కాళరాత్రి స్తుతి 

కమలహంస వృత్తము

న భ స న జ ర.. యతి 11

ఖరతురంగ కఠిన చిత్త గణములైన దైత్యులన్ 

హరి విహారమునకు బంప నలరు కాళరాత్రివే

శరణు వేడు సుజనవర్య చయపుఁ గల్పవల్లివై 

శరద రాత్రి వగుదు వీవు సకల లోక రక్షకీ! 

 

1) దధి/ఉదధి

గణములు:-- భ భ భ

యతి లేదు

ప్రాస కలదు

శైలసుతా! నవరాత్రుల

వేళల దొల్తను గొల్తుము

మాలిమి లోకుల నెల్లర   

నీ లలి నిత్యము నేలుము.  

2) అర్థకల వృత్తము

గణములు స స స

యతి లేదు.

నవరాత్రుల శైలసుతా! 

శివరాణివి నీవనుచున్

కవనాలను బూవులతో  

స్తవమాల లివే గొనవో.   

 

3) మహాలక్ష్మీ వృత్తము

గణములు ర ర ర

యతి లేదు.

మేనదేవీ తుషారాద్రులే 

సూనగా నిన్గొనన్ బున్నెముల్ 

బూని యే జన్మలో జేసిరో 

మానినీ శైలపుత్రీ! నతుల్.

నరేంద్ర మోది జన్మదినం

 

సీ. పెండ్లాము బాధ్యత పిల్లల రక్షణ 

... తరువాత తరమను తగవు లేదు

పోగేతపై యావ భోగాల లాలస 

...పదవిఁ గాచుకొను దురదయు లేవు

వయసుతోఁ బైఁబడు వ్యాధుల బాధయుఁ 

...దిండి తిప్పల ధ్యాస దెలియ రావు

దీన స్వభావము హీన ప్రభావము

...దాపులనైనను దోపఁ బోవు 

తేగీ. సౌఖ్య మనఁ బ్రజ కొనఁగూడు సౌఖ్య మగును

రాగ మన దేశమాతపై రాగ మగును

వాంఛ యన భారతమును బ్రపంచ గురువు

పదవిలో నిల్పుటే 'మోది' వాంఛ యగును.

ఉ.సాగెను సాళ్ళు చాల మన చల్లని బంగరు భారతాంబపై

వీగి పరాయిగడ్డ పొదపెట్టిన గాయము కాని నేటికిన్

బాగును గోరు పాలకుఁడు బాధ్యత వర్తిలు ధీరనేతయై

లాగుచు నుండె బండిఁ గని ప్రాంజలి సేయఁగ దేశభక్తులే.

కం. ఏది సమస్త సమస్యలు

మేదిని భారతము నిలువ మేటిగ జగతిన్

హ్లాదినియై, ప్రజ లెల్లరు,

మోది శతాయుష్కు డగుత, ముదమునఁ జెలఁగన్.

మకర సంక్రమణం 2026

 

పితరులు వత్తు రీ దినము పృథ్వికి సంక్రమణంపు వేళ సం

తతి గని మోదమై తనిసి తద్దయు దీవన లీయ, వారికై

హితముగ తర్పణాదికము లిచ్చి మముం గను డంచు శ్రద్ధతో

నతు లిడ నట్టి వారల కనంత శుభంబులు గూడు సర్వదా.

శ్రీ కృష్ణ యజుర్వేద సంపూర్ణ ఘన పారాయణం 2025

శ్రీ దత్తాత్రేయ వేదవిద్యా గురుకులం, కొంతమూరు, రాజమహేంద్రవరం

************************************************************************

చం. నలుబది నాల్గు పన్నముల నాలుగు దిక్కులు పిక్కటిల్లగన్

తొలిపలుకమ్మ మోము విడ తోషము తోడను జూచువారికిన్ 

బులకలు రేగ దేహముల బొల్పగు దీక్షను వేదపండితుల్

సలిపి యజుస్సునన్ ఘన యజమ్మును మించిరి ధన్యజీవులై.

చం. పదియును నారు మంది ఘన పండితు లొక్కెడ జేరి పుస్తకం

బెదియును ముట్టఁబోక తమకే తగు ధారణ పైన నమ్మికన్

వదలక యొక్క మంత్రమును బాడుట కృష్ణయజుస్సు నెల్ల  ము

ప్పది దినముల్ దినమ్మునకు బట్టుగ నెన్మిది గంట లబ్రమౌ.

చం. కుదురుగ నొక్క భంగిమను గూర్చొని యాసన మందు దీక్షతో

వదనములందు చూపులను వాక్కుల వేసటఁ జూపబోక ష

ట్పదములు పూవులందు మధు పానము జేసెడి వేళ మోదమున్

గదలక తన్మయత్వమున గార్యము సల్పెడి యట్లు దోచెడిన్.

చం. మరువక ముందు వెన్కలకు మార్చక మంత్రములందు స్థానముల్

స్వరముల నౌను కాదనుచు సల్పక వాదము లెంత మాత్రమున్ 

బరు విడు స్వర్నదీ ఘన ప్రవాహము వోలెను సాగె నంతయున్ 

తరమొకొ వేదవిద్వరులు దక్కిన వారల కిట్టి విద్దియల్.

సీ. ఎవరు వచ్చితి రిట యెవరు కూర్చుండిరి

...యెవరు వెళ్ళితి రను యెరుక లేదు

కాల మెంతాయెను కతుకుట యెప్పుడు 

...విశ్రాంతి యెపు డను వెరపు లేదు

కదలక కూర్చుండ కాళ్ళు నెప్పులు వచ్చె 

...చాలు పోవుద మన్న సడులు లేవు

తడుముకొనుట గాని వడి తగ్గుటయు గాని

...సుంతైనఁ దోపదు వింతగాను

తేగీ. విసుగు గనరాదు వేసట చాయ లేదు

ఒక్క గొంతుగా స్వరముగా నొదిగి సాగె

మొదటి దినపు టుత్సాహమ్ము మొత్తము నెల

తొలిచదువు సూరులందున తుదివరకును.

కం. రాజమహేంద్రవరమ్మున 

నీ జగతీమంగళేష్టి యెపుడో జరిగెన్ 

మా జన్మలు తరియించఁగ

నీ జన్నము మరల జరిగె నీ గురుకులమున్.