padyam-hrudyam

kavitvam

Wednesday, March 22, 2023

శోభకృత్ రమ్ము




తూరుపు దిక్కునం బ్రభలు దోచెను క్రొత్తగ గాలితెమ్మెరల్

జోరుగ సాగె నవ్య సుమ సుస్మిత సౌరభ వాహ పంక్తులై

భూరుహ పంక్తి లేజివురు భూషల వెల్గె వసంత మాయె నీ

ధారుణిపై పరాత్పర సుధామయ దృక్కులు సోకి నట్లుగా.


ప్రాభవ మొప్ప నల్దెసల భవ్య మనోజ్ఞ వసంత రాగ స

చ్ఛోభన దీప్తులన్ గరపి క్షోణితలమ్మును భూతకోటికిన్

శోభలఁ గూర్చు ధామముగఁ జొప్పడఁ జేయఁగ రమ్ము నీకిదే

శోభకృతాఖ్య నూత్నయుగసుందరి! స్వాగత మందుఁ బ్రేమతో. 



No comments: