నింగిని స్వేచ్ఛగా నెగురు నిద్దపు వన్నెల జాతి గుండె లు ప్పొంగెడు రీతి భారత విభూతులఁ జాటుచు విశ్వ మెల్ల యీ

బంగరు నేలకుం దగిన భవ్య పతాకపు రూపశిల్పి! యో

పింగళి వెంకయార్య! నినుఁ బ్రీతిఁ దలంతు మెడందల న్సదా.

*****

డెబ్బది యైదేండ్లైనది

అబ్బో మనకెదురులేదు ఆహా ఓహో

ఇబ్భరతావని నని మన

ముబ్బుట సరి యౌనె స్వేచ్ఛ యున్నదె నిజమై?

నేతి బీర లోని నేయి ౘందము కాదె

నేటి స్వేచ్ఛ గనగ నిజముగాను

దొరలు మారలేదు దొరల రంగే మారె

పాలకులను దేశ భక్తి డొల్ల.

*****

నేతల చిత్తవృత్తులను నీతి నిజాయితి నిర్మలత్వమున్

బ్రీతియు దేశభక్తి ప్రభవిల్లుత, దేశపు భాగ్యమే సదా

చేతల బల్లవించుచును స్వేచ్ఛకు మాన్యత దక్కుగాత, యే

భీతులు లేక పౌరులు వివేకముతో గురితించి బాధ్యతల్

పాతర వేయుగాత తమ భావికి కైదువ యోటు హక్కుతో

మేతల కాలవాలమయి మెక్కుచు స్వార్థపుటూహలెక్కువై

జాతి సుసంపదన్ పదవి చాటున రెచ్చెడి దుష్టబుద్ధులన్,

పూతలు గాత భారతికి మోమున వాడని స్మేరపుష్పముల్.