ఘనునకు నత్రిపుత్రునకుఁ గామిత దాయికి నా దిగంబరాం
గునకును భస్మ లేపిత సుకోమల దేహికిఁ బాపహారికిన్
అనఘనుఁ గూడి దివ్య దరహాస సముజ్జ్వల దీప్త చంద్రికల్
దనరఁగ బ్రహ్మ విష్ణు శివ తత్త్వములం బ్రకటించు మూర్తియై
"మనమున నార్తితోఁ దలఁచు మాత్రనె నేఁ జనుదెంచు వాఁడఁ ద
త్క్షణమునె, స్మర్తృగామి నిల, దత్తుఁడ నైతిని సాధుకోటి" కం
చని యభయమ్ము నిచ్చి, శరణన్న కుబుద్ధుల నైన ప్రేమతోఁ
దన దరిఁ జేర్చి దుష్ట కలి తాపములన్ హరియించు స్వామికిన్
బ్రణతు లొనర్తు భవ్య పదబంధము నిమ్మని నాకు సత్కృపన్
వినయము మీర మ్రొక్కెదను వీడక నన్ను ననుగ్రహించుకై.
No comments:
Post a Comment